Bëhet e ditur se Anglia ka trajnuar ushtarët e Arabisë Saudite, e cila akuzohet për shkeljen e të drejtave të njeriut në Jemen.
Sipas lajmit të gazetës angleze “The Guardian” në Akademinë Ushtarake MbretëroreSandhurst dhe në Kolegjin Mbretëror Detar prej vitit 2015 e këtej janë duke u trajnuar të paktën 43 ushtarë sauditë.
Në lajmin e gazetës thuhet se shumica e 43 ushtarëve në fjalë trajnohen në Kolegjin Mbretëror Detar, ndërsa tërhiqet vëmendja se Forcat Detare Saudite akuzohen për rrethimin, i cili posaçërisht prek fëmijët dhe për vrasjen e peshkatarëve në Jemen, që ballafaqohen me urinë.
“The Guardian” njoftoi se informatat në lidhje me numrin e ushtarëve sauditë i mori pas pranimit të ankesës së saj në gjykatë, të bërë pas refuzimit të kërkesës së saj pranë Ministrisë së Mbrojtjes për të dhënë informata në lidhje me çështjen.
Ministria e Mbrojtjes e Anglisë, nuk dha informata për shumën e parave të fituara nga këto trajnime. Si arsyetim Ministria në fjalë paraqiti rrezikun e ndikimit në marrëdhënie mes Londrës dhe Riadit dhe të përdorimit të këtyre të dhënave nga ana e vendeve dhe kompanive tjera për konkurrencë.
Deputeti i Partisë Laburiste, Lloyd Russell-Moyle, në prononcimin e tij për çështjen tha se “trajnimi i ushtarëve sauditë nga ana e Anglisë është vetëm pjesa e dukshme e ajsbergut që i mundëson makinerisë luftarake saudite të shkatërrojë popullin e Jemenit”.
Russell-Moyle gjithashtu akuzoi qeverinë për “fitim të parave nga vuajtjet e njerëzve”.
Priyanka Motaparthy nga Organizata për Monitorimin e të Drejtave të Njeriut (Human Rights Watch-HRW) tha se kjo informatë tregon se sa ngushtë bashkëpunon ushtria angleze me sauditët, ndërsa shtoi se ushtria saudite po zbaton bllokadë detare ndaj Jemenit dhe po i ret peshkatarët jemenas.
Ndërkaq sipas një lajmi që përcjell kanali televiziv “Sky News”, Anglia prej vitit 2015 e këtej i ka shitur armë koalicionit të udhëhequr nga Arabia Saudite, i cili ndërmerr operacione në Jemen, në vlerë 5,7 miliardë sterlina./ trt
