Në një letër drejtuar Kombeve të Bashkuara, Siria ka tërhequr vëmendjen për një rritje të shpejtë të sulmeve terroriste vdekjeprurëse kundër civilëve në Damask dhe periferitë e tij, duke i bërë thirrje organizatës botërore të marrë masat e duhura kundër vendeve që mbështesin dhe financojnë grupet e armatosura.
Ministria e Jashtme e Sirisë i dërgoi një letër shefit të OKB-së dhe kryetarit të Këshillit të Sigurimit të OKB, pasi grupet militante të vendosura në rajonin e Ghutës Lindore sulmuan kryeqytetin Damask dhe fshatrat rreth tij me predha vdekjeprurëse, duke vrarë dhe plagosur dhjetëra njerëz, raportoi agjencia e lajmeve SANA. Letra e dënoi sulmin si “vazhdimësi e krimeve të kryera në bazë ditore nga këta terroristë kundër qytetarëve në Damask”, duke thënë se ata kanë gjuajtur më shumë se 1.500 predha në shtatë javët e fundit dhe kanë lënë qindra të vdekur e të plagosur. Ministria më vonë akuzoi disa zyrtarë perëndimorë se kanë mbështetur në mënyrë të drejtpërdrejtë terroristët dhe se i kanë inkurajuar ata për të kryer sulme, pa frikë se do të mbaheshin përgjegjës. “Këta zyrtarë janë bashkëpunëtorë në krimet e terroristëve kundër civilëve të pafajshëm në Damask dhe fshatrat e tij, pasi ata po mohojnë të drejtën e shtetit sirian për të mbrojtur qytetarët e tij, për të luftuar terrorizmin dhe për t’u përballur me ata që financojnë dhe armatosin terroristët”. Terroristët kanë masakruar civilët gjatë shtatë viteve të fundit “sipas udhëzimeve nga padronët e tyre” në kryeqytetet perëndimore dhe të shteteve të Gjirit Persik” thuhet në letrën e qeverisë së Damaskut./ PT