Çfarë ndodhi në mbledhjen 2-ditore të qeverisë në Vlorë? Është kjo pyetja që gëlon në korridoret e mazhornacës pas frikës për ndonjë “stuhi” në kabinetin qeveritar.
Në ditën e parë u zhvilluan dy takime. Gjatë paradites mësohet se është folur për reformat, arritjet dhe synimet. Burime nga takimi i thanë lapsi.al se Rama nuk ka dhënë ndonjë shenjë pakënaqësie ndaj ndonjë ministri.
Më takim merrnin pjesë edhe kreu i Kuvendit, Gramoz Ruçi dhe kryetari i Grupit Parlamentar, Taulant Balla. Ditën e diel paradite diskutimet janë fokusuar te zgjedhjet e ardhshme lokale. Për këtë shkak takimit iu bashkuan edhe kryebashkiaku i Tiranës Erion Veliaj dhe bashkëkryetari i komisionit për reformën zgjedhore, Bledi Çuçi.
Prania e Veliajt në takim është ndoshta një shenjë se ai do të jetë sërish kandidat i socialistëve për Tiranën. Rama ka ndarë detyra për të gjithë ministrat.
Rreth orës 14.00 ministrat dhe të tjerët kanë lënë rezidencën qeveritare në Vlorë dhe janë larguar në drejtime të ndryshme. Ministrat janë qetësuar, por përkohësisht. Në 7 shtator do të mblidhet Asambleja e Përgjithshme e PS-së. Nëse do të ketë ndryshime në qeveri aty është vendi ku do ta mësojnë të gjithë.
Dihet që pas Asamblesë është thirrur edhe një mbledhje e kryesisë së PS-së. Ajo që ra në sy ishin masat e forta të sigurisë në të cilat u mbajt kjo mbledhje qeverie. Jo vetëm rezidenca qeveritare, por edhe në ndërtesat e tjera pranë saj shiheshin forca të Gardës së Republikës./ lapsi
