Instituti turk “Yunus Emre” në Shkodër ka organizuar ekspozitën e Ebrusë me titull “Kujtime që mbeten pas asaj që shkoi”, nga Edita Muça.
Krahas shumë figurave dhe personaliteve të artit dhe kulturës shqiptare dhe turke merrte pjesë edhe zv.Ambasadori i Republikës së Turqisë në Shqipëri, Sinan Cem Bash i cili në fjalën e tij tha:
“Qënia njerëzore është një qenie e vdekshme, por diçka që nuk vdes, pra është përjetshme me njeriun, është shpirti. Në ekspozitën e sotme ne do të shohim, do të përjetojmë dhe ndiejmë reflektimin e shpirtit të Editës, do të shohim mençurinë, korrektesën dhe artin e saj nëpërmjet Ebrusë. Dhe Ebruja faktikisht kjo është, ndoshta mund të quhet shenjë gishtërinjsh e vetë Editës…”
Ndërsa kryetarja e bashkisë së Shkodrës, znj. Voltana Ademi e pranishme në këtë ekspozitë tha se Elida Muça shpirtin e artit të saj në Ebru e shkriu në botën e miqësisë dhe dashurisë shqiptaro-turke.
“…Ajo që bëri Edita është shumë. Ajo me pikturën e saj, me artin dhe mirësinë e saj dhe një model i një vajze të mirë të Shkodrës, të një familje të mirë shkodrane, të një qytetërimi që Shkodra e ka, e përçoj ate përtej Shkodrës, me Turqinë…”
Autorja e ekspozitës, shkodrania Edita Muça, fitoi të drejtën e studimit me bursë në Fakultetin e Farmacisë të Universiteti të Stambollit në vitin 2009. Gjatë viteve të studimit në Turqi Edita shfaqi interes ndaj artit Ebru dhe në vitin 2011 morri pjesë në kursin e Ebrusë të organizuar nga Bashkia e Stambollit dhe përjetoi mundësinë e njohjes nga afër të këtij arti. Pas mësimeve te marra në këtë kurs, ne vitin 2012 Edita punoi me pasion si trajnuese vullnetare në kurset e Ebrusë. Në vitin 2010, periudhë kur Edita kishte rolin e Zyrtarit të Kulturës dhe Promovimit të Kryeqytetit Europian të Kulturës, Stambolli; Kryeministri Recep Tayyip Erdoğan i dhuron asaj Kartë Vullnetarizmi me shënimin “Me dëshirën që të mbeteni gjatë gjithë jetës një Stambollase”.
Kjo ekspozitë mbart rëndësi të veçantë për të demostruar zhvillimin e miqësisë Turqi-Shqipëri dhe kontribuon në marrëdhëniet dypalëshe kulturore. Nga ana tjetër, ajo prezanton artin e Ebrusë, i cili njihet dhe është përcaktuar nga UNESCO në Listën e Trashëgimisë Kulturore Abstrakte.
Ekspozita e Ebrusë nga Edita Muça, ishte e përbërë nga 23 punime të përzgjedhura nga koleksioni punimeve të saj dhe që u përjetuan me shumë emocione nga vizitorë të shumtë./ trt