Konfederata e Përgjithshme e Punës (CGT) dhe Forca e Punëtorëve (FO), dy prej pesë sindikatave kryesore në Francë, bënë thirrje përmes një komunikate të përbashkët për organizimin e manifestimeve dhe aktiviteteve në shkallë vendi më datë 28 qershor, për të mbrojtur të drejtat e punëtorëve, pensionistëve, të papunëve dhe studentëve.
“Manifestimet dhe aktivitetet në shkallë vendi do të organizohen për të bashkuar profesionet e të gjithë sektorëve në një objektiv të përbashkët. Vlerësimi i situatës do të bëhet në fund të muajit gusht duke siguruar një unitet sa më gjerë dhe pas kësaj date do të përcaktohen hapat që do të bëhen”, thuhet në komunikatën e dy organizatave në fjalë.
Në Francë, miliona njerëz kanë marrë pjesë në grevat dhe manifestimet e organizuara kohëve të fundit kundër reformave dhe politikave shtrënguese të qeverisë.
Kjo është thirrja e parë e përbashkët e CGT-së dhe FO-së që pas grevave dhe manifestimeve të organizuara në Francë kundër draftit për ndryshimin e Kodit të Punës në vitin 2016.
Grevat dhe protestat që po organizohen në Francë prej një kohe, do të përfundonin në fund të muajit qershor, por tashmë ato pritet të vazhdojnë gjatë tërë sezonit të verës për shkak të qëndrimit të Parisit zyrtar./ trt
