Nga: Yuri Cortez
Disa mund të habiten duke parë një vajzë të veshur me shami në San Cristobal të Meksikës, pasi për më shumë se 20 vjet, ka komunitete muslimane që jetojnë atje. Sot, qyteti mund të konsiderohet qendra jozyrtare e muslimanëve në shtetin e Chiapas.
Sputnik ka komunikuar me udhëheqësin e njërit prej këtyre komuniteteve për të kuptuar se si Islami arriti të përhapej në tokat e Majasë së lashtë.
Historia e Islamit në Chiapas lidhet, çuditërisht, me kryengritjen Zapatiste të vitit 1994. Menjëherë pas rebelimit, një grup predikuesish spanjollë i sugjeroi nënkomandantit Marcos, ideologut kryesor të grupit, konvertimin e rebelëve në Islam. Megjithatë, udhëheqësi Zapatista refuzoi të takohej me predikuesit e Spanjës dhe kështu ata filluan të konvertonin vetë njerëzit vendas.
Sipas regjistrimit të fundit të Institutit Kombëtar të Statistikave dhe të Gjeografisë (INEGI), në vitin 2010, ishin 3,760 muslimanë në vend, 110 prej të cilëve jetonin në Chiapas.
Njëri prej grupeve muslimane me prani të madhe në shtetin e Chiapas është Xhemati Musliman Ahmedia. Ibrahim Chechev, imam nga San Cristobal, i tha Sputnikut për origjinën dhe perspektivën e komunitetit.
Deri më sot, Xhemati Ahmedia është i përbërë nga 60 familje dhe ky numër është në rritje.
“Shumë njerëz indigjenë po kërkojnë një udhëheqës të vërtetë. Ata e gjejnë atë në komunitetin tonë dhe e marrin përmes mësimeve të Islamit”. (Ibrahim Chechev)
Sipas Chechevit, shumica e muslimanëve në San Cristobal de las Casas, që është qendra e komunitetit, janë me origjinë indigjene.
Disa grupe u konvertuan në Islam në vitin 1995. Shumë njerëz ishin pjesëtarë të EZLN (Ushtria Zapatista e Çlirimit Kombëtar), tha Chechev
“Menjëherë pasi u konvertuan në Islam, të gjitha luftimet u lanë mënjanë. Kështu që, komuniteti musliman është i pastër nga çdo grup i armatosur”. (Ibrahim Chechev)
“Tani nuk kemi shumë kontakte me EZLN-in. Xhemati Musliman Ahmedia nuk ka paragjykim ndaj askujt, aq më pak ndaj Ushtrisë Zapatiste të Çlirimit Kombëtar”, tha Chechev.
Sipas Chechevit, prej të katër grupeve muslimane të San Cristóbal, dy janë Sufi, një është Vehabi dhe tjetra është Xhemati Ahmedia.
Xhemati Ahmedia i San Cristobal de las Casas ka një marrëdhënie shumë të ngushtë si me qeverinë vendore, ashtu edhe me atë shtetërore, gjithashtu edhe me qeverinë federale. Për më tepër, ky grup përpiqet të marrë pjesë në jetën shoqërore.
Muslimanët ahmedianë bashkëpunojnë me organizatën Humanity First. Si pjesë e këtij bashkëpunimi, anëtarët e këtij grupi kanë ndihmuar shumë gra që të parandalonin një sërë sëmundjesh, në veçanti, kancerin e qafës së mitrës dhe kancerin e gjirit.
“Duke qenë muslimanë dhe qytetarë të San Cristóbal, ne nuk kemi asnjë lloj keqkuptimi apo ndonjë problem tjetër. Përkundrazi, po forcojmë lidhjet me fetë e tjera”, tha Chechev
“Ne jemi gjithmonë në favor të paqes dhe të bashkimit, pavarësisht nga lloji i fesë që deklarohet. Ne i respektojmë, i duam dhe ndjekim vëllezërit tanë të krishterë, pa marrë parasysh nëse janë evangjelistë, katolikë apo ndonjë tjetër”. (Ibrahim Chechev)
“Anëtarët e komunitetit kanë një marrëdhënie të mirë dhe të ngushtë, si në mjedisin e xhamisë së tyre ashtu edhe në shoqërinë në përgjithësi”, shtoi imami.
Sipas Chechev, Xhemati Musliman Ahmedia është krejtësisht kundër terrorizmit dhe atyre që e dëmtojnë emrin e Islamit.
Ai shpjegoi që rrënja e fjalës “islam” në arabisht është “paqe”, ndërsa fjala “musliman” mund të përkthehet si “ai që i bindet vullnetit të Allahut”. Prandaj, anëtarët e këtij komuniteti, në një mënyrë pozitive duhet “t’u mësojnë njerëzve mesazhin e vërtetë të Islamit”, shpjegoi Chechev.
Qëllimi ynë është të promovojmë dhe ta interpretojmë Islamin në mënyrë të saktë për të gjithë këta njerëz që e marrin atë të gabuar. Ka shumë konfuzion në shoqëri. Njerëzit shpesh e lidhin Islamin me terrorizmin dhe me abuzimin me gratë. (Ibrahim Chechev)
Chechev shtoi se ka njerëz që pretendojnë se Islami nuk duhet të ekzistojë sepse është një fe shumë agresive.
Kjo është njëra prej arsyeve që Xhemati Ahmedia “vazhdimisht po lufton” kundër këtyre paragjykimeve për të transmetuar mësimet më të bukura të Islamit.
Burimi: Sputnik/ Gazeta impakt