Prokuroria kërkon burg për Tahirin, Gjykata e Lartë regjistron rekursin

Gjykata e Lartë ka regjistruar në shqyrtim ankimin e Prokurorisë së Krimeve të Rënda e cila kërkon sërish masën e sigurisë me burg ndaj ish-ministrit të Brendshëm, Saimir Tahiri.

Sipas njoftimit zyrtar të gjykatës, regjistrimi i rekursit është bërë më datën 18 korrik 2018, ku prokuroria kërkon “Caktimin e masës së sigurimit personal “arrest në burg” për personin nën hetim, Saimir Tahiri.

Rekursi u paraqit nga prokuroria pasi Gjykata e Apelit për Krime të Rënda, hoqi masën e arrestit në shtëpi ndaj Tahirit që hetohet për trafik droge në bashkëpunim me grupin e vëllezërve Habilaj nga Vlora dhe për shpërdorim detyre.

Organi i akuzës mësohet se pret përgjigje nga autoritetet italiane dhe malazeze në lidhje me disa udhëtime që ish-ministri Saimir Tahiri ka kryer në këto shtete gjatë kohës që ishte në detyrë. Prokuroria dyshon se personat që ka takuar Tahiri në këto udhëtime kanë lidhje me aktivitetin kriminal për të cilin është hapur procedimi penal pas publikimit të përgjimeve të kryera nga prokuroria e katanias ndaj grupit kriminal italo-shqiptar të drejtuar nga Moisi Habilaj.

Masa e arrestit me burg ishte kërkuar nga prokuroria edhe në Gjykatën e Shkallës së Parë për ish-ministrin Tahiri, por togat e zeza, më 12 maj të këtij viti, refuzuan burgosjen e ish-ministrit duke e lënë atë në arrest shtëpie.  Ish-zyrtari qëndroi në këtë masë vetëm për dy javë, pasi Gjykata e Apelit e shfuqizoi atë duke e lënë të lirë Saimir Tahirin pa masë sigurimi.

Prokuroria nuk u tërhoq duke paraqitur rekurs në Gjykatën e Lartë duke theksuar se ndaj ish-ministrit duhet të caktohet masa e arrestit me burg që ishte kërkuar ndaj tij që në fillim të majit.  Edhe pse ishte parashikuar që hetimet ndaj Saimir Tahirit të përfundonin në fund të korrikut, Prokuroria e Krimeve të Rënda ka vendosur ti zgjasë ato në pritje të provave të reja nga jashtë vendit.

Ndërkohë Gjykata e Lartë dhe anëtarët e saj është në proces Vettingu. Një pjesë e gjyqtarëve janë përjashtuar dhe ky institucion është në limitin e anëtarëve që duhet të ketë për të marrë vendime. Nëse Vettingu vijon me këtë ritëm, shumë shpejt nuk do të ketë asnjë gjyqtarë që të marrë në shqyrtim një çështje kaq të ndjeshme politike si kjo e ish-ministrit, Saimir Tahiri

NDANI KËTË POSTIM

Mund tju interesojne