Pas taksës 100 për qind ndaj produkteve të Serbisë dhe Bosnjës, sot Qeveria e Kosovës iu ka vënë taksë edhe brendeve ndërkombëtare që vijnë nga Serbia.
Në mbledhjen e mbajtur sot Qeveria ka vendosur t’i shqyrtojë propozimet për masa të reja ndaj Serbisë, të cilat edhe janë aprovuar.
Prej sot në Kosovë nuk do të mund të hyjë pa iu nënshtruar taksës 100 përqind asnjë lloj malli nga Serbia, pavarësisht vendit të origjinës.
Këtë vendim Qeveria e Kosovës e ka marrë pas kërkesës të ministrit të Tregtisë dhe Industrisë, Endrit Shalës, në mënyrë që masa prej 100 përqind të trajtojë njëlloj të gjitha kompanitë.
Ministri Shala u shpreh se kanë sugjerim nga të gjithë miqtë që të trajtojnë në mënyrë të barabartë të gjitha kompanitë.
“MTI dëshiron që të jetë e barabartë për të gjitha kompanitë, për këtë MTI kërkon heqjen e listës, e cila do të hyjë në fuqi më 1 janar të vitit 2019”, tha ai.
Kurse, kryeministri Ramush Haradinaj tha se ajo që është e papranueshme është letra e kryeministres serbe, Ana Bernabiq, e cila kërkon që vendet që kanë njohur Kosovën të tërheqin njohjen.
Sipas tij, kjo është e papranueshme.,
