Kryeministri Edi Rama deklaroi nga Librazhdi se nuk do të ketë asnjë ulje në tryezë me opozitën, siç ndodhi pas marrëveshjes politike të prillit 2019, që rrodhi pasi opozita u “mbyll” në çadër para kryeministrisë për rrëzimin e qeverisë.
Rama risolli në vëmendje kërcënimin e Bashës kur ishte në çadër, kur thoshte se nuk do të hynte në zgjedhje me këtë qeveri, por sipas kryeministrit u futën në garë elektorale pasi morën disa ministra teknike. Kreu i qeverisë tha se Basha tashmë po kërkon të marrë edhe gjysmën tjetër të qeverisë, por kjo nuk do të ndodhë.
Shefi i mazhorancës tha se socialistët e kanë provuar ndershmërinë e fitores edhe kur ka qenë në pushtet Sali Berisha si kryeministër.
“Ne i kemi mundur ata kur kishin Saliun dhe kishin edhe shtetin. A ka demokrat të thotë se ishte më e lehtë të mundësh Saliun se sa Lulin me fallxhoren që ka në krah. Në Durrës Dako që i janë qepur për ta kthyer në shënjestër i mundi Saliun, shtetin me gjithë hordhitë e tyre në 2007, 2011, 2013, 2017. I kemi mundur Saliun që nuk bënte gjë për të na penguar për të nxjerrë votën nga kutitë dhe nuk mundim dot Lulin?!” deklaroi Rama.