Në Selinë e Shenjtë në Vatikan, shefi i diplomacisë kosovare, Behgjet Pacolli u takua me sekretarin e Shtetit, Paul Richard Gallagher.
Tema kryesore e bisedës ishin zhvillimet në Kosovë, forcimi i marrëdhënieve midis Kosovës dhe Selisë së Shenjtë, bëhet e ditur përmes një komunikate për media.
Në fillim të bisedës, Pacolli, e njohu bashkëbiseduesin me një bilanc të përparimit të brendshëm dhe të afirmimit të shtetësisë së Kosovës, që sot njihet në botë nga 115 shtete.
“Kosova sot në dhjetëvjetorin e vet ka një kuadër kushtetues model për marrëdhëniet ndëretnike, të cilat kanë njohur përmirësim të jashtëzakonshëm. Bashkëjetesa fetare, gjithashtu është shembull për rajonin”, ka thënë Pacolli, transmeton Koha.net.
“Në vazhdim të takimit, Pacolli kërkoi shtim të kontakteve midis Kosovës dhe Vatikanit, rritje të nivelit të përfaqësimit dhe njohje të shtetit të ri të Kosovës, si kontribut për paqen dhe stabilitetin në rajon”, thuhet në komunikatë.
Nga ana e tij, Kardinali Gallagher, njohës i mirë i zhvillimeve në rajon dhe në Kosovë, tha se, “ju e njihni mirësinë që ka Ati i Shenjtë, Papa Françesku, dhe Selia e Shenjtë ndaj popullit të Kosovës. Ne i dimë aspiratat e popullit tuaj dhe i vlerësojmë ato. E dimë se komuniteti katolik i vendit tuaj dëshiron të rrisë nivelin e organizimit në dioqezë dhe ne do të bëjmë hapa të matur. Ne nuk kushtëzohemi nga askush, por thjesht duam që të mirëkuptohemi nga të gjithë aktorët në rajon, për çdo hap që bëjmë. Ne jemi të gatshëm të rrisim bashkëpunimin me Kosovën”.
Duke falënderuar për dhuratën që riprodhonte me filigran figurën e Nënë Terezës, Kardinali Gallagher tha se, “ne duam që figura e Nënë Terezës të shërbejë si simbol i bashkimit për rajonin tuaj.”
Më pas, duke e njohur ministrin Pacolli me fokusin, që Ati i Shenjtë Papa Francesku i ka dhënë rinisë për 2018, Kardinali Gallagher kërkoi informacion prej bashkëbiseduesit të tij për gjendjen e të rinjve në Kosovë, në pikëpamje të punësimit, të aktivizmit shoqëror, etj.
Më tutje thuhet se ministri foli edhe për zhvillimin ekonomik e social në vend, dhe përpjekjet për të përfshirë në punësim, në një arsim cilësor rininë e Kosovës, një rini që e do përparimin, lëvizjen e lirë, një rini me mendje të hapur.
Pacolli e ftoi Kardinalin Gallagher për një vizitë në Kosovë në kuadër të festimeve të dhjetëvjetorit të Pavarësisë. Biseda kaloi në një frymë mirëkuptimi të ngrohtë dhe miqësor.
