Ministri i Mbrojtjes Kombëtare, Hulusi Akar tha se ushtari turk do të jetë pranë popullit dhe përballë terroristëve në Siri.
Pas mbledhjes koordinuese të operacionit “Burimi i Paqes” që Forcat e Armatosura të Turqisë po zhvillojnë në lindje të lumit Eufrat në Siri e që u kryesua nga Presidenti Recep Tayyip Erdogan, ministri Akar i bëri vlerësime operacionit në fjalë.
Duke vënë në dukje që ashtu si deri më sot edhe gjatë operacionit “Burimi i Paqes” civilët, veprat historike, objektet kulturore dhe fetare janë të paprekshme, ministri Akar tha se “Ne i kushtojmë shumë rëndësi sigurisë jo vetëm të vendit dhe kombit tonë, por edhe të grupeve tjera fetare dhe etnike që jetojnë në rajonin tonë”.
Akar theksoi se zona e sigurt që planifikohet të formohet në kufirin Turqi-Siri është opsioni më logjik dhe humanitar për kthimin e refugjatëve në shtëpitë e tyre, ndërsa tha se “Ne kurrë nuk do të pranojmë formimin e një korridori terroristë në kufirin tonë me Sirinë të gjatë 911 km”./trt
