Një aksion ndërkombëtar antidoping goditi një rrjet të trafikut të substancave stimuluese duke arrestuar qindra vetë.
Aksioni i koduar “Viribus” i koordinuar nga Karabinierët në Itali, u shtri në bashkëpunim me 33 shtete përfshirë këtu edhe Shqipërinë.
Gjithashtu në këtë aksion mori pjesë edhe Organizata Botërore Antidoping, e cila mundësoi që gjatë eventeve të ndryshme sportive të bëheshin mbi 1 mijë analiza gjaku.
“Viribus” nisi në tetor të vitit 2018 me kapjen e 13 anëtarëve të një grupi në Itali e Rumani dhe vazhdoi më tej me një total që shkoi në 234 të arrestuar.
Sipas raportimeve mediatike, ky aksion bëri të mundur zbulimin e 9 laboratorëve dhe ndalimin e 24 tonëve steroid pluhur dhe 3.8 milionë substancave të tjera të kategorizuara si doping.
Në Shqipëri Policia raportoi gjithashtu se kishte dhënë bashkëpunim me kapjen nga grupi i antidrogës i 175 kg mrofinë, ketaminë, ekstazi, metadon etj.
Sipas policisë nga ky operacion u bë e mundur “goditja e 17 grupe të lidhura kryesisht me falsifikimin e ilaceve, por edhe me substancat stimuluese doping”./ exit
