Bota

Amerika nën hijen e konfliktit etnik

Autoritetet në Sherlotsvill, në shtetin amerikan të Virxhinias, kanë shpallur gjendjen e jashtëzakonshme në prag të një marshimi masiv të nacionalistëve të bardhë.

Disa mijëra persona pritet t’i bashkohen manifestimit “Bashkimi për të Drejtën”, që kundërshton planet për heqjen nga vendi të statujës së një gjenerali të Luftës Civile amerikane që ishte pro skllavërisë. Ende pa nisur tubimi, përleshjet shpërthyen mes grupeve të ekstremit të djathtë dhe anti-protestuesve, që janë mbledhur gjithashtu në qytet. Sipas policisë, të paktën 2 persona janë plagosur. Forcat e rendit kanë qëlluar gaz lotësjellës ndaj demonstruesve dhe kanë deklaruar se janë kryer disa arrestime pas një njoftimi për mbajtjen e një mitingu të paligjshëm në vendin e njohur si Parku i Emancipimit. Gjendja e jashtëzakonshme po u lejon autoriteteve lokale që të kërkojnë ndihma shtesë në rast nevoje. Kjo, pasi protestuesit e ekstremit të djathtë janë të armatosur dhe të veshur me uniforma milicie dhe mbajnë flamuj të Konfederatës. Ata janë acaruar nga planet e autoriteteve për lëvizjen e statujës së gjeneralit Robert E Lee, i cili udhëhoqi forcat e Konfederatës në luftën civile amerikane të viteve 1861-65.

“New York Times” raporton se disa prej protestuesve bërtisnin “Ju nuk do të na zëvendësoni” dhe “Hebrenjtë nuk do të na zëvendësojnë”. Për t’iu bërë kontrast, organizata anti-raciste si “Black Live Matter” janë mbledhur gjithashtu në tubime. Guvernatori i Virginias, Terry McAuliffe është shprehur se mesazhi i vetëm për supremacistët e bardhë, të cilët shkaktuan kaos në qytetin Charlottesville, është “shkoni në shtëpi”. Një grua ndërroi jetë dhe 19 të tjerë u plagosën, kur një automjet përplasi turmën e njerëzve që kundërshtonin një miting të ekstremit të djathtë që mbahej në këtë qytet. FBI-ja ka hapur zyrtarisht një hetim mbi të drejtat e njeriut pas këtij incidenti. Pak përpara incidentit me automjetin, sherre dhe shkëmbime grushtash pati mes nacionalistëve dhe bardhë dhe kundërshtarët e protestës që zhvillohej. Prokurori i Përgjithshëm i Shteteve të Bashkuara, Jeff Sessions tha se “dhuna dhe viktimat në Charlottesville goditën zemrën e ligjit dhe drejtësisë amerikane”. “Kur ndodhin të tilla veprime nga fanatizmi dhe urrejtja racore, ata kanë tradhtuar vlerat tona kryesore dhe nuk mund të tolerohen”, tha kryeprokurori. James Fields, 20-vjeçar nga Ohio, është i dyshuari që drejtoi automjetin e tij drejt turmës, e tashmë ndodhet në paraburgim me akuzën për vrasje të shkallës së dytë./ PT

OPINIONE