Nga Ali Harb
Kur Fondacioni Heritage, një institut i fuqishëm konservator në Shtetet e Bashkuara, publikoi vitin e kaluar një plan strategjik për të shkatërruar lëvizjen e solidaritetit me Palestinën, ai nuk tërhoqi shumë vëmendje.
Por më shumë se tetë muaj më vonë, ky dokument politik – i njohur si Projekti Esther – po përballet me vëmendje dhe shqyrtim të shtuar nga aktivistë dhe media, pjesërisht sepse Presidenti Donald Trump duket se po ndjek udhëzimet e tij. Autorët e Projektit Esther e paraqesin raportin si një paketë rekomandimesh për luftën kundër antisemitizmit, por kritikët thonë se qëllimi i vërtetë i dokumentit është të “helmojë” grupet kritike ndaj Izraelit, duke i portretizuar ato si të lidhura me Hamasin.
Projekti Esther u krijua si përgjigje ndaj protestave në rritje kundër mbështetjes që SHBA-ja i jep luftës së Izraelit në Gaza, të cilën ekspertët e OKB-së dhe organizatat për të drejtat e njeriut e kanë përshkruar si gjenocid.
Çfarë është Projekti Esther dhe si po zbatohet ndaj aktivistëve?
Ja një vështrim mbi dokumentin dhe ndikimet që po sjell në SHBA:
Çfarë është Fondacioni Heritage?
Fondacioni Heritage është një think tank konservator me ndikim në Washington, DC, me mision të deklaruar:
“të formulojë dhe promovojë politika publike të bazuara në parimet e ndërmarrjes së lirë, qeverisë së kufizuar, lirisë individuale, vlerave tradicionale amerikane dhe mbrojtjes së fortë kombëtare.”
Megjithatë, kritikët argumentojnë se Projekti Esther kërkon ndërhyrje qeveritare për të kufizuar liritë individuale, përfshirë të drejtën e fjalës së lirë dhe të organizimit, kur bëhet fjalë për kundërshtimin ndaj politikave të qeverisë izraelite.
Çfarë synon të arrijë Projekti Esther?
Iniciativa pretendon se synon të “shkatërrojë infrastrukturën që mbështet” atë që e quan “Rrjeti i Mbështetjes për Hamasin” brenda 24 muajve.
Çfarë është “Rrjeti i Mbështetjes për Hamasin”, sipas Projektit Esther?
Autorët e projektit pretendojnë se grupet që avokojnë për të drejtat e palestinezëve janë pjesë e këtij rrjeti.
Ata e përkufizojnë këtë rrjet të supozuar si:“Njerëz dhe organizata që janë, drejtpërdrejt ose tërthorazi, të përfshirë në përparimin e kauzës së Hamasit, në kundërshtim me vlerat amerikane dhe në dëm të qytetarëve amerikanë dhe interesave të sigurisë kombëtare të Amerikës.”Me pak fjalë, dokumenti pretendon se “lëvizja pro-palestineze” është “në thelb një rrjet që mbështet terrorizmin.”
A ekziston vërtet “Rrjeti i Mbështetjes për Hamasin”?
Jo.Nuk ekziston asnjë rrjet i tillë në SHBA, e cila ka ligje shumë të ashpra kundër ofrimit të mbështetjes materiale për grupe të shpallura si organizatë terroriste, përfshirë Hamasin.Beth Miller, drejtoreshë politike në organizatën Jewish Voice for Peace (JVP) – një nga grupet që Fondacioni Heritage e përmend si pjesë të rrjetit – i quajti akuza të Projektit Esther si “të çmendura”.“Kjo tregon se sa larg janë gati të shkojnë me gënjeshtra dhe absurditete për të shkatërruar lëvizjen për të drejtat e palestinezëve,”– tha Miller për Al Jazeera.Fondacioni Heritage nuk iu përgjigj kërkesës së Al Jazeera për koment.
Si synon Projekti Esther të godasë lëvizjen për të drejtat e palestinezëve?
Dokumenti bën thirrje për një fushatë shumëdimensionale kundër mbështetësve të të drejtave palestineze, duke i shënjestruar ata në mënyrë ligjore, politike dhe financiare.Iniciativa përshkruan 19 objektiva, të cilët i quan “efekte të dëshiruara”.Këto përfshijnë:
- Mohimin e aksesit në universitete për mbështetësit e të drejtave palestineze që nuk janë shtetas amerikanë;
- Sigurimin që platformat e mediave sociale të mos lejojnë “përmbajtje antisemitike”;
- Paraqitjen e “provave për aktivitete kriminale” nga aktivistët pro-Palestinë tek autoritetet ekzekutive të SHBA-së;
- Refuzimin e lejeve për protesta që mbështesin të drejtat e palestinezëve.
Projekti gjithashtu nxit përkrahësit e Izraelit të ndërmarrin “kërkime ligjore dhe private” ndaj grupeve pro-Palestinë, me qëllim që të “zbulojnë shkelje penale” dhe të minojnë besueshmërinë e tyre.“Ne duhet të zhvillojmë një luftë ligjore (lawfare),”thuhet në dokument – një referencë ndaj përdorimit të gjyqeve si mjet për të ushtruar presion ndaj kundërshtarëve.
A po i shndërron administrata Trump rekomandimet e Projektit Esther në politika zyrtare?
Duket se po.“Faza në të cilën ndodhemi tani është fillimi i zbatimit të disa linjave të veprimit, në aspektin legjislativ, ligjor dhe financiar, për çfarë ne e konsiderojmë mbështetje materiale për terrorizmin,”– tha Victoria Coates për The New York Times.Shtypja e protestave universitare nga ana e Trump-it përputhet me objektivat që përshkruan Projekti Esther.Për shembull, administrata amerikane ka filluar të revokojë vizat për studentët e huaj që janë kritikë ndaj Izraelit – një masë që përkon me një nga propozimet në Projektin Esther, i cili kërkon identifikimin e studentëve që “shkelin kushtet e vizës studentore”.Fondacioni Heritage citon gjerësisht Canary Mission – një faqe interneti e cila dokumenton dhe shpif ndaj studentëve pro-Palestinë – në shënimet fundore të Projektit Esther. Ekziston dyshimi se edhe administrata Trump po mbështetet në këtë faqe, së bashku me grupe të tjera pro-Izrael, për të identifikuar studentët për deportim.Për më tepër, Projekti Esther vë në shënjestër departamentet e studimeve për Lindjen e Mesme, Afrikën e Veriut dhe Islamin, duke pohuar se këto përmbajnë profesorë “armiqësorë ndaj Izraelit”.Administrata Trump ka ushtruar presion ndaj universiteteve elitare për të ristrukturuar këto departamente akademike, që i konsideron të njëanshme në favor të palestinezëve. Për shembull, Universiteti Columbia emëroi një provost për të shqyrtuar këto programe, me kërkesë të Trump, duke filluar “menjëherë me departamentin për Lindjen e Mesme.”Shtëpia e Bardhë nuk iu përgjigj kërkesës së Al Jazeera-s për koment.
Cilët grupe i përmend Projekti Esther si objektiva?
Projekti identifikon qartë disa organizata arabe, myslimane dhe hebreje progresiste, si dhe grupe studentore, si pjesë e të ashtuquajturit “Rrjeti i Mbështetjes për Hamasin”.Iniciativa pretendon se “rrjeti qendrohet rreth” organizatës American Muslims for Palestine (AMP) – një organizatë që merret me edukim dhe avokim qytetar.Osama Abuirshaid, drejtori ekzekutiv i AMP, tha se Projekti Esther e vë në shënjestër grupin vetëm pse ka fjalën “mysliman” në emër, duke shfrytëzuar paragjykimet islamofobike.“American Muslims for Palestine është një objektiv i lehtë. Duke pasur parasysh prirjet islamofobike, është shumë e lehtë të fajësosh myslimanët amerikanë, palestinezët… Është një emër që ngjitet shpejt,”– tha Abuirshaid për Al Jazeera.Ai shtoi se grupi është në shënjestër edhe sepse është efektiv dhe ka një bazë të fortë mbështetjeje:“Nëse ata arrijnë ta godasin dhe ta rrëzojnë AMP-në, kjo do të ketë një efekt frikësues në gjithë lëvizjen. Ata mendojnë se, nëse e shkatërrojnë ne, grupet e tjera do të ndalojnë së punuari për solidaritetin me Palestinën,”– shtoi ai.
Pse përqendrohet Projekti Esther te universitetet?
Tariq Kenney-Shawa, studiues i politikës amerikane pranë Al-Shabaka, një institut palestinez mendimi, thotë se Projekti Esther e ka në shënjestër arsimin e lartë, sepse Izraeli po humb mbështetjen mes të rinjve në SHBA.“Kjo është arsyeja pse ka një përqendrim kaq të madh në universitetet dhe kampuset kolegjiale,” – tha ai për podcastin The Take të Al Jazeera-s.Kenney-Shawa shpjegon se mbështetja për luftën e Izraelit në Gaza është në rënie në të gjitha grupmoshat e shoqërisë amerikane, por ndryshimi është shumë më i ndjeshëm në universitetet amerikane:“Ndërsa ky ndryshim është i pranishëm në të gjithë spektrin politik, ai është dukshëm më i theksuar te e majta dhe mes të rinjve amerikanë.”Një sondazh i fundit nga Pew Research Center tregoi se 53% e amerikanëve kishin një mendim negativ për Izraelin, ndërsa kjo shifër rritet në 71% mes demokratëve nën moshën 50 vjeç.
A po funksionon Projekti Esther?
Aktivistët thonë se në afat të shkurtër, represioni ndaj lëvizjes për të drejtat e palestinezëve rrezikon sigurinë dhe mirëqenien e aktivistëve, veçanërisht të studentëve të huaj.
Por ka pasur edhe kundërpërgjigje.“Natyrshmëria ekstreme e këtyre sulmeve ka bërë që njerëzit të ndihen të sfiduar dhe më të vendosur për të vazhduar të flasin,” – tha Beth Miller nga Jewish Voice for Peace (JVP).“Dhe në shumë raste, kjo ka zgjuar njerëz që më parë nuk i kushtonin vëmendje hipokrizisë së gjatë që ekziston në përpjekjet për të heshtur dhe censuruar aktivistët për të drejtat e palestinezëve.”Në fillim të majit, disa ligjvënës të djathtë dhe aleatë të Trump-it dolën kundër një projektligji që synonte të zgjerojë ndalimet ndaj bojkotit të Izraelit, duke përmendur shqetësime për lirinë e shprehjes.Osama Abuirshaid, drejtori ekzekutiv i American Muslims for Palestine, i dha të njëjtën notë zhvillimeve:Ai e pranoi se sulmet mediatike, arrestimet dhe paditë ndaj aktivistëve dhe studentëve protestues kanë qenë shpërqendruese nga misioni kryesor për fokusin në Palestinë.Por ai shtoi me vendosmëri: “Po e them qartë: këto na japin energji për të vazhduar këtë betejë.”/Gazetaimpakt/aljazeera
