Siria dëshiron që SHBA dhe aleatët e saj të paguajnë për shkatërrimin e infrastrukturës siriane dhe të mbajnë përgjegjësinë ligjore për “bombardimin e paligjshëm” të objekteve civile, i ka thënë Damasku OKB-së, duke kërkuar që koalicioni i udhëhequr nga SHBA-ja të ndalet.
“Qeveria siriane këmbëngul që këto sulme duhet të përfundojnë dhe se anëtarët e këtij koalicioni të paligjshëm duhet të mbajnë përgjegjësinë politike dhe ligjore për shkatërrimin e infrastrukturës në Republikën Arabe Siriane, duke përfshirë edhe përgjegjësinë për kompensim”, tha Misioni i Përhershëm i Republikës Arabe Siriane në Kombet e Bashkuara në letrat drejtuar Sekretarit të Përgjithshëm të OKB-së dhe Presidentit të Këshillit të Sigurimit.
Duke deklaruar se sulmet ajrore anti-terroriste të udhëhequra nga Shtetet e Bashkuara “vazhdojnë të marrin jetën e qindra civilëve të pafajshëm sirianë”, Damasku deklaroi se shpërthimet kishin çuar në një “shkatërrim pothuajse total” të shtëpive dhe infrastrukturës vitale, duke përfshirë shkatërrimin e objekteve të naftës dhe gazit.
Sulmet, së bashku me kufizimet ekonomike të vendosura nga SHBA dhe BE mbi Sirinë, “po pengojnë mbajtjen e këtyre objekteve ekonomike dhe rrezikojnë perspektivat për zhvillim dhe rindërtim” në vend, thuhej në letrat e shkruara javën e kaluar.
Për të mbështetur pretendimet, korrespondenca e Sirisë iu referua dy rasteve të fundit ku avionët e koalicionit shkatërruan objekte të naftës dhe gazit. Damasku tha gjithashtu se bombardimet e 27 majit në fshatin Hasu Albu Awf në Hasakah “shkatërruan” shumë shtëpi dhe vranë të paktën tetë civilë, “shumica prej tyre fëmijë”.
Të premten, koalicioni i udhëhequr nga Shtetet e Bashkuara njoftoi shkatërrimin e një numri objektesh të naftës dhe gazit në pjesë të ndryshme të Sirisë, të cilat thuhet se i përkisnin grupit terrorist të Shtetit Islamik (ISIS).
Synimi i tregtisë ilegale të naftës dhe infrastrukturës xhihadiste të terroristëve ka qenë një strategji themelore e amerikanëve dhe rusëve në Siri. Por ndërsa Moska bashkërendon sulmet e saj me qeverinë siriane, operacioni i udhëhequr nga Uashingtoni është kritikuar ashpër për praktikat e tij bombarduese pa dallim dhe pa komunikuar me forcat qeveritare siriane.
Letrat e Damaskut drejtuar OKB-së edhe një herë nënvizuan se fushata ajrore amerikane po zhvillohet në kundërshtim me të drejtën ndërkombëtare, pasi ajo nuk ka asnjë lloj pëlqimi apo autorizimi nga qeveria siriane.
Raka, e njohur si bastioni i ISIS-it, ka qenë fokusi kryesor i operacionit të SHBA-së në Siri, ku Uashingtoni është duke udhëhequr dhe mbështetur Forcat Demokratike të Sirisë (SDF).
Ndërkaq operacioni amerikan Vendosmëri e Qenësishme këtë muaj konfirmoi një total prej 603 vdekjesh civile në fushatën ajrore të udhëhequr nga SHBA-ja në Siri dhe Irak. Airëars, një grup në Mbretërinë e Bashkuar që monitoron sulmet ajrore dhe viktimat civile, pohoi këtë javë se kishte arritur të gjurmonte “më shumë se 700 vdekje të mundshme civile” vetëm në Raka – madje para fillimit të betejës për qytetin në qershor.
Megjithatë, ka pak mundësi që dokumenti të ketë ndonjë pasojë për Uashingtonin, tha për RT profesori i marrëdhënieve ndërkombëtare Jamal Wakeem.
“Unë nuk besoj se Kombet e Bashkuara do të ndërmarrin ndonjë veprim kundër Shteteve të Bashkuara, sepse ne e dimë se tradita e OKB-së ka qenë që të mos veprojë kundër ndonjë agresioni të bërë nga SHBA kundër çdo vendi”, tha Wakeem.
Edhe sikur OKB të ecë përpara me pretendimet e Sirisë, “SHBA, si anëtare e përhershme e Këshillit të Sigurimit të OKB-së, do të vërë veton ndaj çdo rezolute që mund të propozohet kundër saj”, shtoi Wakeem.
Megjithatë, lëvizja e Sirisë “mund të ndikojë në SHBA, jo në nivel politik, por në një nivel moral”, tha profesori. / © Gazeta Impakt
