Ministri i Jashtëm i Malit të Zi, Srdjan Darmanoviç pas takimit me homologun e tij turk Mevlüt Çavuşoğlu në Ankara deklaroi se “Investitorët turq në Mal të Zi janë shumë të çmuar dhe dëshirojmë edhe më shumë investime turke”, raporton Anadolu Agency (AA).
“Sigurisht se investitorët gjatë veprimtarisë së tyre në çdo vend hasin në vështërsi, por fakt është se në Mal të Zi ka gjithnjë e më shumë investitorë dhe qytetarë turq, si dhe kompani të vogla dhe shumë investitorë të ri të interesuar, në mesin e të cilave janë disa kompani të njohura ndërkombëtarisht, dëshmon se investitorët turq ndjejnë Malin e Zi, ashtu si ne ndjejmë Turqinë. Jam i sigurtë se bashkëpunimi mund të jetë më i mirë”, ka thënë Darmanoviç.
Mali i Zi i përkushtuar për paqe dhe stabilitet
“Jemi anëtar të NATO-s dhe kemi ecur dukshëm para në bisedimet për anëtarësim në Bashkimin Evropian. Kemi marrëdhënie të shkëlqyera me të gjithë fqinjët dhe si të tillë çdo herë jemi të gatshëm të ndihmojmë në zgjidhjen e problemeve në rajon. Në rajon kishin ngecur tre probleme të mëdha, njëra ishte emri i Maqedonisë së Veriut, që ishte midis këtij vendi dhe Greqisë, ky problem u zgjidh suksesshëm me guxim, vizion dhe përkushtimin e dy qeverive për gjetjen e zgjidhjes. Si rezultat i kësaj zgjidhjeje Maqedonia e Veriut është në rrugë për në NATO dhe BE. Çështja e dytë ka të bëjë me dialogun midis Beogradit dhe Prishtinës, e cila kërkon një zgjidhje afatgjate. Ne jemi miq me të dyja vendet dhe i mbështesim drejt gjetjes së një zgjidhjeje”, tha ministri i Jashtëm malazez.
Problemi i tretë sipas tij është “mosfunksionimi i Bosnjë e Hercegovinës”.
Darmanoviç konsideron se “BE-ja duhet të dijë se çfarë do nga Ballkani Perëndimor”
“Politika vendimtare e zgjerimit të Ballkanit Perëndimor është zgjidhja e vetme edhe për ne edhe për BE-në. Të gjitha vendet tona të rajonit duan të bëhen pjesë e këtij komuniteti. Për këtë nevojiten përpjekjet tona dhe të BE-së. Mendoj se do të ishte inkurajues hapi që në tetor Maqedonia e Veriut dhe Shqipëria të marrin dritën e gjelbër për fillimin e bisedimeve ndërsa Mali i Zi dhe Serbia të vazhdojnë me hapjen dhe mbylljen e kapitujve”, ka thënë Darmanoviç.
Ai është i mendimit se nga vendet e rajonit anëtar i parë i BE-së të jetë pikërisht Mali i Zi, i cili mbështet rrugën evropiane të fqinjëve të saj./ AA
