Shqiperia

Debati për Teatrin, Erion Veliaj “kumbari” i Kumbaros

Ministrja e Kulturës, Mirela Kumbaro, u largua me shpejtësi të martën nga Komisioni Parlamentar i Medias, pasi Albana Vokshi dhe deputetë të tjerë të opozitës detyruan të largohej kryebashkiakun e Tiranës, Erion Veliaj nga mbledhja ku do të diskutohej për ligjin e “jashtëzakonshëm” për Teatrin.

Çështja e godinës së Teatrit Kombëtar ka mbërthyer prej ditësh debatin politik dhe ndërmjet artistëve në Shqipëri, pas një projekti të qeverisë dhe bashkisë së Tiranës për rrëzimin e saj dhe rindërtimin brenda një kompleksi rezidencial, nëpërmjet procedurës së Partneritetit Publik-Privat (PPP).

Ministrja e Kulturës, e cila formalisht ka dorëzuar në qeveri projekt-ligjin e “jashtëzakonshëm” për kalimin e pronësisë publike të teatrit, në qendrën muzeale të Tiranës, në favor të një subjekti privat, deri më tani nuk është përballur personalisht me deputetët dhe opinionin publik.

Kumbaro është thirrur disa herë për shpjegime para Komisionit të Medias, i cili drejtohet nga deputetja demokrate, Albana Vokshi. Por ministrja ka justifikuar në çdo rast mungesën e saj për shkaqe të axhendës.

Gjatë ditëve të fundit, ajo ka dalë në krah të kryebashkiakut të Tiranës, Erjon Veliaj, në dy dëgjesa publike, me artistët dhe arkitektët, lidhur me çështjen e godinës së Teatrit Kombëtar. Në këto dy dëgjesa, ministrja Kumbaro nuk ka folur asnjë fjalë, duke i lënë të gjithë hapësirën publike kryebashkiakut Veliaj dhe njëkohësisht politikanit që vlerësohet se është kandidatura më e mundshme për marrjen e lidershipit të Partisë Socialiste.

Mungesa e prononcimit të Kumbaros për një çështje, debati për të cilën është iniciuar nga zyra e saj, krijon përshtypjen publike se ajo është tërësisht jashtë loje në projektin PPP për truallin e Teatrit Kombëtar.

Kjo u konstatua edhe mesditën e së martës, kur Kumbaro ishte e ftuar në Komisionin e Medias për të dhënë shpjegimet lidhur me projekt-ligjin që mundëson kalimin e truallit të Teatrit në favor të një subjekti privat. Me shumë mundësi, e paaftë për të mbrojtur diçka që nuk e ka përgatitur vetë, ministrja e Kulturës e kishte shumë të nevojshme praninë e Kryetarit të Bashkisë së Tiranës, Erion Veliaj, njëlloj si në dëgjesat publike.

Veliaj u paraqit i paftuar para Komisionit të Medias, duke shkaktuar debate të ashpra me kryetaren e Komisionit, Vokshi, e cila kërkonte largimin e tij nga mbledhja, pasi nuk e kishin planifikuar paraqitjen e tij. Por Veliaj, në rolin e “kumbarit” të Kumbaros, refuzoi largimin, duke sjellë edhe acarime ndërmjet deputetëve të maxhorancës dhe opozitës.

Pas rreth 45 minutave debat, Veliaj u bind të largohej nga salla dhe bashkë me atë, edhe deputetët e maxhoranës. Por, më e çuditshmja ishte që, nga salla u largua edhe ministrja Mirela Kumbaro, e cila kishte detyrimin kushtetues dhe ligjor që të përgjigjej në seancën dëgjimore parlamentare, e thirru nga deputetët e opozitës që vijuan të qëndronin në mbledhje./ boldnews

OPINIONE