Presidenti i Republikës, Ilir Meta në një komunikim të hapur me gazetarët ka folur sërish për informacionet sekrete, të cilat kishin parashikuar se në 8 qershor, rrezikohej të digjej Kuvendi i Shqipërisë. Ai nuk dha detaje shtesë, por theksoi se deputetët kanë të drejtën ligjore të njihen me informacionin. Ai tha se ky dokument është plotësisht i vërtetë.
Kreu i Shtetit foli edhe për raportin e OSBE-ODIHR mbi 30 qershorin, i cili sipas tij tregoi se palët treguan një antagonizëm të fortë duke mos u krijuar mundësinë qytetarëve të zgjidhnin alternativa.
“Sa i takon deklaratës sime të një elementi të ri për opinion publik se kam patur një informacion nga institucionet më të lartë të sigurisë është sekret i klasifikuar. Kjo është një e vërtetë dhe unë nuk kam thënë ndonjëherë ndonjë gënjeshtër. Unë nuk mund të them më shumë në respekt të ligjit.
Ata e kanë mundësinë sipas ligjit të njihen me këtë informacion dhe të njihen sipas rregullave. Informacioni është tërësisht i vërtetë. Ajo që mund t’iu them me bindje të plotë. Në këtë dokument ju do ndiqni shqetësimet e kohës. Ju do ta shihni dhe do ta kuptoni se ishte një situatë e çmendur. Këtë nuk mund ta përshkruante më mirë as vetë raporti i OSBE-ODIHR. Mos të harrojmë edhe të gjithë kontekstin e zhvillimeve në rajon, sepse zhvillimet ne vend nuk janë të shkëputuara nga vendet e tjera. Kjo nuk ishte surprizë. Bëhet fjalë për mungesë të përgjegjësisë së përbashkët. Kuptohet se edhe dikush përtej dy palëve mund ta shfrytëzonte situatën për akte të destabilizmit dhe kjo do të ishte e vështirë më pas për të gjetur aktorët e frymëzimit të këtij veprimi”-tha Meta./balkanweb
