Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit në mbledhjen e sotme ka trajtuar mandatin e deputetit Etem Arifaj.
Kryetari i këtij komisioni Driton Selmanaj, tha se kanë kërkuar që të respektohet ligji që parasheh humbjen e mandatit kur një deputet dënohet me burgim.
Ai tha se edhe kërkesa e kryetares së Kuvendit, bashkëpartiakes së tij Vjosa Osmani, ishte e pabazë.
“Ishte e pabazuar dhe në kundërshtim me rregulloren e adresuar nga kryetarja e Kuvendit. Ne si komision nuk trajtojmë çështjet gjyqësore të papërfunduara. Ne do t’i japim një përgjigje ku i thamë se respekto ligjet dhe kushtetutën”, tha ai.
Ai ka thënë se në kërkesën e kryetares së Kuvendit nuk ka pasur asnjë referencë, e që sipas tij kjo nuk duhet të ndodh.
Në këtë komision është bërë edhe Shqyrtimi i kërkesës së deputetit Behgjet Pacolli për interpretim të detyrave dhe funksionit të deputetit si dhe pengimit në kryerjen e detyrave kushtetuese.
“Çështja e dytë e z.Behxhet Pacolli, kjo në fakt bie në mandatin e komisionit. Ne dhamë vlerësimin tonë që të gjitha institucionet të mundësojnë ushtrimin e lirë të punës së deputetit Pacolli. Asnjë institucion nuk duhet të pengojë një deputet. Janë publike si është penguar z.Pacolli. Ajo çka për neve është e rëndësishme është që deputetët të mos ndalohen. Ata përfaqësojnë votën e njerëzve dhe duhet të respektojnë mandatin e tyre. Arrestimet e deputetëve mund të ndodhin në regjimet tjera, jo në demokraci”, tha ai./mesazhi
