Autoritetet e dy Koreve nënshkruan një marrëveshje të rëndësishme për bashkëpunim ushtarak, e cila synon uljen e tensioneve dhe parandalimin e konflikteve në rajon.
Agjencia e lajmeve Yonhap, shkruan se ministri i Mbrojtjes i Koresë së Jugut, Song Young-moo, dhe homologu i tij verikorean, No Kwang-chol, nënshkruan marrëveshjen në Phenian, ku presidenti i Koresë së Jugut, Moon Jae-in, është në një vizitë tre-ditore.
Mëngjesin e sotëm ai deklaroi se lideri i Veriut, Kim Jong-un, për herë të parë është dakorduar për ndërmarrjen e hapave konkrete për denuklearizim, përfshirë mbylljen e përhershme të kompleksit Yongbyon.
Kim Jong-un nga ana e tij tha se dy Koretë ranë dakord të heqin të gjitha armët bërthamore bashkë me kërcënimet në Gadishullin Korean.
Ai njoftoi mbi një vizitë të tij në Seul, e cila do të jetë takimi i katërt i këtij viti i liderëve koreanë.
Burimi: AA
