Kryetari i AAK-së, Ramush Haradinaj ka refuzuar ftesën e kryeministrit në detyrë të Kosovës, Albin Kurti, sa i takon një takimi ku do të flitej për menaxhimin e pandemisë COVID-19. Përmes një letre drejtuar Kurtit, Haradinaj bën me dije se nuk mund të bëhet pjesë e një takimi, pasi kryeministri është bërë shkelës i Kushtetutës dhe nuk ka më legjitimitet demokratik.
Haradinaj ka thënë se gjendja e jashtëzakonshme do të mobilizonte të gjitha resurset e vendit në shërbim të përballimit të krizës.
“I nderuar Kryeministër në detyrë, z. Albin Kurti,
Si përgjigje në shkresën tuaj të datës 17.04.2020, më lejoni që të theksoj se tani e një kohë kemi shprehur shqetësimet tona për mënyrën e menaxhimit të pandemisë nga Qeveria e shkarkuar, që Ju e udhëheqni, deri në krijimin e Qeverisë së re.
Paraprakisht, ua bëjë me dije se, ne vazhdimisht kemi qenë të zëshëm dhe në përkrahje të shpalljes së gjendjes së jashtëzakonshme, në përputhje me ligjet dhe Kushtetutën, dhe ishte befasuese qasja juaj paranoike, e nxitur nga lufta politike, e cila ka vënë në rrezik të plotë shëndetin e qytetarëve të Kosovës. Gjendja e jashtëzakonshme do të mobilizonte të gjitha resurset e vendit, duke përfshirë kapacitetet e nevojshme njerëzore, ekspertizën gjithëpërfshirëse si dhe resurset relevante për menaxhimin e nevojshëm, efektiv dhe të suksesshëm ndaj pandemisë COVID-19. Për më tepër dhe si konfirmim i hapave tuaj të gabuar, kam shprehur mospajtimin tim me masat dhe vendimet tuaja për kufizimin e lirisë së lëvizjes dhe lirive tjera themelore të cilat edhe Gjykata Kushtetuese i gjeti si jokushtetuese.
Veprimet tuaja si shkelës recidivist i Kushtetutës me ridefinimin dhe vazhdimin e marrjes së vendimeve, që kufizojnë liritë dhe të drejtat themelore, janë duke e dëmtuar rëndë demokracinë, duke cenuar thellësisht të drejtat e njeriut, si dhe ligjshmërinë e kushtetutshmërinë në Republikën e Kosovës.
Të kujtoheni, që pas më shumë se një muaj e gjysmë gjendje emergjente, të thërrisni tryezë debati lidhur me pandeminë, me akterë institucionalë dhe përfaqësues të partive politike parlamentare, është dëshmi e qartë se ju jeni joserioz, anti-institucional dhe mashtrues. Për më tepër, pas shkarkimit me mbi 2/3 e votave të deputetëve të Kuvendit të Republikës së Kosovës, ju nuk e keni as legjitimitetin e nevojshëm për përgjegjësitë që ju pretendoni t’i ndërmerrni në përgjithësi.
Përderisa ftesat tuaja janë të vona në kohë e në raport me zhvillimin dhe nuk janë të kualifikuara me legjitimitet institucional e poltik, me kënaqësi ju njoftoj se nuk do të marrë pjesë asnjëherë në tryezat e tilla”, ka shkruar Haradinaj. Kryeministri në detyrë i Kosovës, Albin Kurti, ka bërë me dije se ka ftuar të hënën në një takim Presidentin Thaçi dhe të gjithë liderët e partive politike. Takimi është planifikuar për të hënën në orën 10:00, dhe pritet që të diskutohet për situatën pandemike në vend. “Nëse janë të gjithë kundër coronavirusit, atëherë do të duhej të vinin në takim”, ka thënë Kurti.
/BW
