Mediat dhe gazetarët e shtypit në Shtëpinë e Bardhë në SHBA, të cilët në disa raste janë konkurrentë të ashpër të njëri-tjetrit kanë bërë një gjest të rrallë dhe mjaft profesional.
Gazetarët reaguan me shqetësim kur administrata Trump e ndaloi gazetaren e CNN Kaitlan Collins të marrë pjesë në një ngjarje presidenciale pas një pyetje që ajo i bëri Trump, në lidhje me çështjen e ish avokatit të tij personal Michael Cohen që e ka regjistruar gjatë bisedës për t’i mbyllur gojën një vajze që pretendon që kishte marrëdhënie me Trump.
Dy zyrtarë të Shtëpisë së Bardhë, Bill Shine dhe Sarah Sanders, i kanë thënë Collins se është e “ papërshtatshme” të marrë pjesë gjatë një eventi tjetër, pas pyetjes që i bëri Trump, gjatë takimit me Jean-Claude Juncker.
Ky ndalim është konsideruar nga CNN, si hakmarrës, ndërsa shumë gazetarë, madje edhe rivalë të CNN janë solidarizuar me gazetaren.
Fox News lëshoi një deklaratë duke thënë “ne qëndrojmë në solidaritet të fortë me CNN për të drejtën për qasje të plotë për gazetarët tanë si pjesë e një shtypi të lirë dhe të papenguar”.
Në fakt Collins, nuk ishte vetëm gazetarja e CNN, por sipas rregullit në SHBA ajo përfaqësonte të gjitha rrjetet televizive, detyrë kjo që qarkullon në të gjitha rrjetet televizive çdo ditë.
NBC, ka deklaruar në shenjë solidariteti: “Këto ishin pyetje nga gazetari i përfaqësimit televiziv, që do të thotë kjo është në mënyrë efektive një veprim i ndërmarrë kundër të gjithë gazetarëve të TV që mbulojnë Shtëpinë e Bardhë”.
FOX News, tha: “Është gabim të ndalosh anëtarët e medias”
Washington Post ka deklaruar se: “ Bllokimi i një gazetari në Shtëpinë e Bardhë, është e pazakontë dhe e pashembullt”.
Shoqata e Korrespondentëve të Shtëpisë së Bardhë tha se “Kjo lloj hakmarrjeje është tërësisht i papërshtatshëm, e gabuar dhe e dobët, dhe nuk mund të qëndrojë”./ Dritare.net