Presidenti turk Rexhep Tajip Erdogan dhe mbreti saudit Salman Abdulaziz Al Saud zhvilluan një bisedë telefonike të enjten dhe diskutuan mbi krizën diplomatike në vazhdim të Katarit dhe emërimin e princit të ri saudit të kurorës, njoftoi media.
Sipas gazetës Daily Sabah që citonte burimet presidenciale turke, palët ranë dakord që të kërkojnë mënyra për të zgjidhur situatën e tensionuar rreth shtetit të Gjirit Persik.
Presidenti Erdogan dhe Mbreti Salman ranë dakord gjithashtu të mbanin një takim në fund të samitit të ardhshëm të G20, i cili do të mbahet në Hamburg, Gjermani, më 7-8 korrik.
Të mërkurën mbreti Salman zëvendësoi princin e kurorës Muhammed bin Nayef, nipin e mbretit, me djalin e tij 31-vjeçar, Mohammad bin Salman. Mediat lokale raportuan gjithashtu se Muhammed bin Nayef ka humbur postin e ministrit të brendshëm. Princi i ri i kurorës do të vazhdojë të shërbejë si ministër i mbrojtjes i vendit.
Më 5 qershor, Arabia Saudite, Emiratet e Bashkuara Arabe, Bahrejni dhe Egjipti thyen marrëdhëniet diplomatike me Dohën dhe ndaluan të gjitha komunikimet me Katarin, duke e akuzuar atë për mbështetjen e terrorizmit dhe ndërhyrjen në punët e tyre të brendshme. Më vonë, Maldivet, Mauritiusi dhe Mauritania njoftuan gjithashtu ndërprerjen e marrëdhënieve diplomatike. Jordania dhe Xhibuti reduktuan nivelin e misioneve të tyre diplomatike në Katar. Senegali, Nigeria dhe Çadi njoftuan tërheqjen e ambasadorëve.
Udhëheqja turke, duke përfshirë Erdoganin dhe Ministrin e Jashtëm Mevlut Çavusoglu, në mënyrë të përsëritur kanë kërkuar që Rijadi të përpiqet të zgjidhë paqësisht krizën e Katarit dhe të tentojë të ndërmjetësojë krizën me mjete diplomatike. / © Gazeta Impakt
