Presidenti i Turqisë, Recep Tayyip Erdogan, arriti në kryeqytetin e Gjermanisë, Berlin, për të marrë pjesë në konferencën ndërkombëtare që do të mbahet sot në lidhje me Libinë.
Presidenti turk u prit në Aeroportin Tegel nga shefi gjerman i Protokollit Konrad Arz von Straussenburg, ministri i Jashtëm turk Mevlüt Çavusoglu, ambasadori i Turqisë në Gjermani Ali Kemal Aydın dhe konsulli i përgjithshëm turk në Berlin Olgun Yucekök.
Në udhëtimin e tij, Erdogan u shoqërua nga ministri turk i Mbrojtjes Hulusi Akar, shefi i Komunikimeve Fahrettin Altun, shefi i inteligjencës turke (MIT) Hakan Fidan dhe i dërguari special i Turqisë në Libi Emrullah İşler.
Kancelarja gjermane Angela Merkel dhe Sekretari i Përgjithshëm i OKB-së Antonio Guterres do të bashkëkryesojnë Konferencën e Berlinit, e cila synon një angazhim më të fortë nga fuqitë botërore dhe aktorët rajonalë për mosndërhyrjen në Libi dhe për të mbështetur armëpushimin dhe embargon e armëve të OKB-së.
Krahas Erdogan, presidenti rus Vladimir Putin, presidenti francez Emmanuel Macron, kryeministri britanik Boris Johnson, kryeministri italian Giuseppe Conte dhe Sekretari i Shtetit i SHBA-së Mike Pompeo kanë konfirmuar pjesëmarrjen e tyre.
Qeveria gjermane njoftoi gjithashtu se kryeministri i Libisë Fayez al-Sarraj dhe komandanti i forcave jolegjitime me qendër në Tobruk, Khalifa Haftar, kanë pranuar ftesën për konferencë.
Zyrtarë të lartë nga Egjipti dhe Emiratet e Bashkuara Arabe, mbështetësit kryesorë të kreut të forcave jolegjitime Haftar, gjithashtu do të marrin pjesë në konferencë./AA
