“Ju pëlqen apo jo, Turqia do të vazhdojë të jetë gjithnjë e më e fuqishme”, ka thënë Presidenti i Republikës së Turqisë, Recep Tayyp Erdogan të shtunën në Stamboll, gjatë fjalimit të tij në ceremoninë e mbylljes së takimeve ndërkombëtare të studentëve, e organizuar nga Federata e Shoqatave Ndërkombëtare Studentore (UDEF).
Duke folur rreth studentëve nga jashtë të cilët shkollohen në universitetet në Turqi, Erdogan tha se në vendin e tij aktualisht për studime të ndryshme qëndrojnë 115 mijë studentë nga jashtë dhe se qëllimi është të arrihet numri prej 350 mijë studentëve.
“Qëllimi ynë është të hyjmë në mesin e pesë vendeve me më së shumti studentë të huaj”, tha Erdoğan.
Ai shtoi se janë marrë masat e nevojshme parandaluese që nga pranimi i studentëve, procesit të studiuarit, dhe deri në diplomimin e tyre, ashtu që studentët të mos shfrytëzohen nga organizatat terroriste FETO, e cila, siç u tha, është armik i Islamit dhe Turqisë.
“Shqipëria për fat të keq është nën një lloj të pushtimit të organizatës terroriste FETO. Sigurisht, ne vazhdojmë bisedimet. Herët a vonë ne do ta shkatërrojmë këtë lëvizje. Çdo ditë ne avancojmë, Fondacioni ynë Maarif në Shqipëri vazhdon procesin e marrjes së kontrollit ndaj institucioneve të atjeshme arsimore”, tha Erdogan.
Duke komentuar rreth qëndrimit të Francës ndaj Turqisë, ai tha se i pëlqen apo nuk i pëlqen Francës, vendi i tij do të jetë gjithnjë e më i fuqishëm.
“Mund të shihni se çfarë ka bërë Franca kohët e fundit kundër Turqisë. Nëse ju pengon se Turqia po bëhet më e fortë dhe më e fortë, nëse ju pëlqen apo jo, ne do të bëhemi gjithnjë e më të fortë”, ka thënë Erdogan.
Erdogan gjithashtu kritikoi Këshillin e Sigurimit të OKB-së.
“Ne tani pyesim 196 vendet: Vallë ju nuk keni të drejtë të jeni anëtarë të përhershëm të Këshillit të Sigurimit të OKB-së?’ Pesë anëtare të përhershme, 15 anëtare të përkohshme dhe 20 anëtare, të gjithë këto 20 anëtare të jenë të përhershme dhe të shkohet në sistemin e rrotacionit. Të gjitha këto 20 anëtare të jenë anëtare të Këshillit të Sigurimit të OKB-së, kështu që do të jetojë anëtarësimi i 196 vendeve anëtare të Këshillit të Sigurimit”, tha Erdogan.
Duke theksuar se aktualisht nuk ka asnjë vend me popullsi myslimane në Këshillin e Sigurimit të OKB-së, Erdogan potencoi: “Si është e mundur? Ne duam drejtësi. OKB-ja është formuar për të vendosur drejtësinë, por a kemi ne aktualisht një qasje të tillë?. Nuk e kemi. Ne do të vazhdojmë ta kërkojmë, ne kërkojmë drejtësi për njerëzimin, herët a vonë do t’ia dalim. Ndoshta jo menjëherë, por një ditë me siguri do t’u përgjigjen kërkesave tona për drejtësinë e të gjithë të shtypurve në botë”. (AA)
