Presidenti Rexhep Tajip Erdoan (Recep Tayyip Erdoğan) sot po realizon një vizitë njëditore në Moskë me ftesë të Presidentit të Rusisë, Vladimir Putin.
Paradite Presidenti Erdoan bashkë me homologun e tij rus, Putin morën pjesë në Panairin Ndërkombëtar të Aviacionit dhe Hapësirës “MAKS-2019”, që zhvillohet në kryeqytetin e vendit, Moskë.
Në fjalën përshëndetëse që mbajti këtu Erdoani tha se “MAKS-2019” e shikojnë si një prej panaireve lider në fushën e vet.
“Edhe ne si Turqi kemi panairin tonë “IDEF”, që sivjet realizuam edicionin e 14-të. Kurse në festivalin e teknologjisë “TEKNOFEST”, që do të zhvillohet në datat 14-22 shtator, presim një pjesëmarrje mbi 1 milionë vizitorë. Në këtë festival ne presim të gjithë popullin rus, me në krye Zotin Putin”,- u shpreh kreu i shtetit turk, ndërsa theksoi se Turqia është sot një vend që i dëgjohet fjala në teknologjinë e mbrojtjes, aviacionit dhe hapësirës.
“Deri në fund të 2018-s, eksporti total i sektorit tonë të mbrojtjes dhe aviacionit arriti në 2,5 miliardë dollarë”,- nënvizoi Erdoan duke shtuar se dialogu i sinqertë dhe i afërt mes Turqisë dhe Rusisë ushqehet nga bashkëpunimi rrënjësor dhe shumëdimensional.
“Presim që këtë vit ta vizitojnë vendin tonë rreth 6 milionë turistë rusë. Vëllimi tregtar mes nesh sot është mbi 25 miliardë dollarë, por objektivi ynë është 100 miliardë dollarë”,- cilësoi Erdogan./trt