Forcat izraelite kanë plagosur gjashtë palestinezë me plumba plastike gjatë protestave të organizuara në Bregun Perëndimor me rastin e 72-vjetorit të Nakbas (Katastrofa e madhe), që i referohet dëbimit masiv të palestinezëve për t’i hapur rrugën krijimit të shtetit të ri izraelit.
Sipas burimeve lokale, një grup palestinezësh protestuan në qytezën As-Sawiya në Nablus me rastin e Nakbas dhe në shenjë reagimi ndaj vendbanimeve ilegale hebreje.
Forcat izraelite intervenuan ndaj protestuesve me plumba plastike dhe gaz lotsjellës.
Gjysmëhëna e Kuqe e Palestinës njoftoi se gjashtë palestinezë janë plagosur me plumba plastike, ndërsa shumë protestues të tjerë janë prekur nga gazi.
Palestinezët e shënojnë 15 majin si Nakba (Katastrofa e madhe), pasi 72 vjet më parë, në vitin 1948, afro një milionë palestinezë u dëbuan nga tokat e tyre për t’i hapur rrugën krijimit të shtetit izraelit, i cili shpalli pavarësinë më 14 maj të vitit 1948.
Gjatë Nakbas, 675 fshatra të palestinezëve u shkatërruan, kurse mijëra palestinezë u vranë.
Si pasojë e këtyre ngjarjeve, 80 për qind e palestinezëve aktualisht jetojnë me statusin e refugjatëve në pjesë të ndryshme të botës./AA