Zëdhënësi i njësisë së provave kriminalistike në Gaza, Mahmud Ashur, ka bërë të ditur se grupi i ri prej 15 trupash të martirëve palestinezë, të cilët kanë qenë të mbajtur nga forcat izraelite dhe janë dorëzuar përmes Komitetit Ndërkombëtar të Kryqit të Kuq, mbërriti në Spitalin Qendror Naser me shenja të dukshme torture dhe keqtrajtimi.
Ashur deklaroi për kanalin Al Jazeera Mubasher se vëzhgimet mbi këto trupa përputhen me ato të grupeve të mëparshme të kthyer, duke treguar një model të përsëritur të dhunës dhe shkeljeve.
Shkelje dhe vjedhje organesh
Sipas Ashurit, shumë prej trupave paraqesin shenja plagësh të rënda, përfshirë plagë me armë zjarri dhe dëmtime nga shpërthime, gjë që tregon për rrethana të paqarta të vrasjes, ndoshta nga ekzekutime nga afër apo goditje me predha të fuqishme.
Ai shtoi se në disa trupa janë gjetur shenja shkatërrimi të plotë në kokë, që tregojnë përdorim të forcës ekstreme, duke bërë të pamundur identifikimin e viktimave.
“Vetëm katër prej trupave janë identifikuar nga familjarët,” – tha ai – “ndërsa pjesa tjetër mbetet e panjohur për shkak të deformimeve të rënda.”
Vështirësi në identifikim dhe mungesë pajisjesh
Ashur theksoi se mungesa e pajisjeve të avancuara, përfshirë laboratorë të analizave kriminalistike dhe teste ADN-je, po e vështirëson ndjeshëm procesin e identifikimit. Ai i bëri thirrje institucioneve ndërkombëtare dhe Komitetit të Kryqit të Kuq të ofrojnë mbështetje teknike dhe logjistike për të ndihmuar familjet të njohin të afërmit e tyre dhe për të zbuluar të vërtetën mbi shkeljet izraelite.
Ai shprehu zhgënjim për heshtjen e komunitetit ndërkombëtar, duke theksuar se ekipet lokale do të vazhdojnë përpjekjet me mjetet e kufizuara që kanë, për të dokumentuar krimet dhe për të identifikuar martirët.
“Një detyrë njerëzore që nuk do të ndalet”
Në lidhje me çështjen e varrimit të përkohshëm të trupave, Ashur u shpreh:
“Kjo është një detyrë njerëzore që nuk do të përfundojë. Ne do të vazhdojmë me të gjitha mundësitë për të zbuluar identitetet e martirëve tanë dhe për të ekspozuar krimet e okupimit.”
Ai shtoi se Izraeli po pengon hyrjen e pajisjeve mjeko-ligjore në Gaza, duke u përpjekur të fshehë gjurmët e krimeve të kryera ndaj trupave të të burgosurve dhe martirëve.
Ashur përfundoi me një apel të ri ndaj organizatave ndërkombëtare:
“Kërkojmë urgjentisht mbështetje për të përfunduar këtë mision humanitar dhe për të zbuluar të vërtetën që po përpiqen ta fshehin.”/kohaislame
