Kreu i Kuvendit është munduar të zbusë reagimet e votuesve të PS-së pas ceremonisë shtetërore të rehabilitimit të kreut të Ballit Kombëtar, Midhat Frashërit dhe polemikave që janë hapur pas zërave për rishikimin e rolit të luftës partizane.
Ato u ndezën fort pas zbulimit të axhendës së një konference shkencore që po planifikon Akademia e Shkencave me rastin e 75 vjetorit të çlirimit, për të shtyrtuar “antifashizmin pa armë” dhe rolin e pjesës gri të popullsisë gjatë luftës së dytë botërore. Po në të njëjtin dokument propozohej edhe rishikimi i termave dëshmor, martir, viktimë etj.
Por në fjalën e tij të hapjes së kuvendit, Gramoz Ruçi, ndryshe nga Rama që ngriti në qiell kreun e kolaboracionistëve apo Erion Veliaj, që celebroi martesën e nipit të Zogut, i është kthyer qëndrimit të majtë të elozjeve për partizanët dhe LANÇ. Ai përsëriti tezat se ajo qe një luftë që e renditi Shqipërinë në krahun e duhur të historisë, hodhi poshtë tezat e dikurshme të Ramës që mbronte versionin e luftës civile duke thënë se “nuk qe një përplasje idesh por një betejë e përgjakshme me pushtuesit” dhe si për të vënë qershinë mbi tortë, kur numëroi aleatat tanë në këtë konflikt botëror fillimisht përmendi ushtrinë e kuqe dhe vetëm më pas anglo amerikanët gjë që vitet e fundit bëhet shumë rrallë nga politikanët shqiptarë.
Kjo kthesë e fortë e Gramoz Ruçit, që është një prej të katapultuarve të paktë Partisë së Punës në Rilindje, bëhet pas zemërimit të fortë të shtresës tradicionale të votuesve veteranë të PS-së, dhe thirrjeve të disa prej eksponentëve të tyre për të mos votuar më për këtë parti.
Por ka gjasë që ajo të jetë edhe një lojë politike e koordinuar me kujdes, ku Ruçi përpiqet t’u hedhë sy ish partizanëve të mbetur gjallë dhe familjeve të tyre, ndërsa Rama punon për të rikuperuar vota të së djathtës dhe qendrës./Lapsi
