Shqiperia

Ish-deputeti i PD, akuza ndaj autoriteteve në Dibër: Fshehën trafikantin se e ka babain polic!

Ish-deputeti i Partisë Demokratike, Xhemal Gjunkshi, ka ngritur akuza ndaj Policisë Vendore të Qarkut Dibër se po mbante të fshehur djalin e një polici në detyrë të shpallur në kërkim ndërkombëtar, i vënë në pranga një ditë më parë.

Gjunkshi thotë se, i arrestuari B. Vranezi ishte prej disa muajsh në Dibër dhe endej i lirë, deri kur policia u detyrua të vërë në zbatim arrestin e ardhur nga Prokuroria Italiane për “trafikim të lëndëve narkotike” dhe “pjesëmarrje në organizatë kriminale”.

“Arrestohet djali i policit në detyrë! Ngjarja e një dite më parë në Dibër, ku u arrestua Besmir Vranezi nxori zbuluar policinë Vendore të Qarkut Dibër.
35 vjeçari Vranezi është djali i Policit Qemal Vranezi, me detyrë Përgjegjës i Postës së Policisë në Maqellarë.

Edhe pse ishte prej disa muajsh në Dibër , Besmir Vranezi endej i lirë dhe i pa shqetësuar nga policia lokale, deri sa këta të fundit, u detyruan të ekzekutojnë urdhër arrestin e ardhur nga Prokuroria Italiane për “trafikim të lëndëve narkotike” dhe “pjesëmarrje në organizatë kriminale”.

Fakti që Qemal Vranezi vazhdon punën shumë i qetë tregon se ai ka një super mbrojtje;

Kush qëndron pas babait polic dhe të birit trafikant? Mbrojtja vjen nga kupola drejtuese e partisë socialiste në pushtet.

Ata mendojnë dhe punojnë vetëm si ti shërbejnë padronëve të krimit të lidhur me politikën”, shkruan Gjunshki.

35-vjeçari u arrestua dje me qëllim ekstradimi në shtetin italian, pas një urdhër arresti të lëshuar nga Gjykata e Trentos në 1 shkurt të këtij viti.

“Kapet dhe arrestohet një tjetër person i shpallur në kërkim ndërkombëtar për “Trafikim i lëndëve narkotike” dhe “Organizatë kriminale”.

Arrestimi i përkohshëm i 35-vjeçarit u bë me qëllim ekstradimin drejt shtetit italian.

Operacioni i finalizuar nga Drejtoria Vendore e Policisë Dibër në bashkëpunim me Interpol Tirana

Strukturat e DVP Dibër, krahas punës për monitorimin e zbatimit të masave, me qëllim parandalimin e përhapjes së COVID-19, vijojnë punën intensive për evidentimin dhe goditjen e paligjshmërisë dhe për kapjen e personave të shpallur në kërkim kombëtar e ndërkombëtar.

Në këtë kuadër, shërbimet operacionale të DVP Dibër, në bashkëpunim me Interpol Tiranën, pas informacioneve të marra në rrugë operative, kanë finalizuar me sukses operacionin policor, duke bërë të mundur lokalizimin e vendndodhjes së një personi në kërkim ndërkombëtar.

Si rezultat u bë kapja dhe arrestimi në qytetin e Peshkopisë, i shtetasit B. A.(V), 35 vjeç, banues në Peshkopi, Dibër.

Kapja dhe arrestimi i përkohshëm u bë sepse shtetasi i lartpërmendur është shpallur në kërkim ndërkombëtar nga Interpol Roma, Itali, pasi Gjykata e Trentos, Itali, më datë 01.02.2020, ka lëshuar urdhër arresti ndëkombëtar për kryerjen e veprave penale “Trafikim i lëndëve narkotike” dhe “Organizatë kriminale”, parashikuar nga Kodi Penal italian.

Maksimumi i dënimit për këto vepra penale është 24 vjet burg.

Materialet procedurale iu referuan Prokurorisë pranë Gjykatës së Shkallës së Parë Dibër, për veprime të mëtejshme”, njoftoi policia një ditë më parë./Tpz

OPINIONE