Zonat e sigurisë të propozuara nga Rusia në Siri – ku nuk lejohet asnjë luftë midis qeverisë dhe opozitës – hynë në fuqi më 5 maj në orën 21:00. RT përmbledh atë që tashmë dihet për iniciativën që ka për qëllim zgjidhjen e konfliktit në vend.
Zonat e sigurta ose de-përshkallëzuese në Siri janë përshkruar si një masë e përkohshme e cila do të zbatohet për gjashtë muajt e ardhshëm me mundësinë e zgjerimit të saj për gjashtë muaj të tjerë.
Për zonat e sigurta kanë rënë dakord shtetet garantuese – Rusia, Irani dhe Turqia – gjatë negociatave në kryeqytetin e Kazakistanit, Astana, të enjten. Të gjitha palët shprehën shpresën se iniciativa do të udhëheqë rrugën drejt zgjidhjes së konfliktit.
Katër zonat e sigurta janë të vendosura në Idlib të Sirisë dhe në pjesë të krahinave fqinje të Latakisë, Alepos dhe Hamas; konkretisht në pjesën veriore të provincës Homs; Në lagjen Damaskus të Gutës Lindore, dhe në pjesë të krahinave jugore Deraa dhe Kuneitra që kufizohen me Jordaninë.
Forcat qeveritare siriane dhe opozita e armatosur do të pengohen të luftojnë me njëra-tjetrën apo të kryejnë sulme ajrore brenda zonave të sigurta me anë të mbrojtësve të sigurisë, pikave të kontrollit dhe vendeve të vëzhgimit të kontrolluara nga shtetet garantuese.
Rusia, Irani dhe Turqia ranë dakord se do të përgatisin harta që do të ndajnë zonat e kontrolluara nga e ashtuquajtura “opozitë e moderuar” nga territoret e mbajtura nga xhihadistët, dhe do të sigurojnë përcaktimin e saktë të zonave të sigurta deri më 4 qershor.
Forcat e Hapësirës Ajrore Ruse i kanë ndaluar tashmë që më 1 maj sulmet ajrore në zonat e përcaktuara si zona të sigurta, tha Ministria e Mbrojtjes e Rusisë.
Hapësira ajrore mbi zonat e sigurta mund të jetë gjithashtu e mbyllur për aeroplanët e koalicionit të udhëhequr nga SHBA-ja. Ministria e jashtme e Rusisë ka thënë se çështja është duke u negociuar midis forcave ruse dhe amerikane.
Aktualisht, rreth 42,000 luftëtarë të opozitës ndodhen në territorin e katër zonave të sigurisë, me shumicën e militantëve të vendosur në Idlib (14,500) dhe afër kufirit jordanez (15,000), sipas vlerësimeve të Rusisë.
Krijimi i zonave të sigurta nuk do të thotë se lufta kundër Shtetit Islamik, Jabhat al-Nusra dhe grupeve të tjera terroriste do të ndalet në vend. Përkundrazi, masa do e lejojë Sirinë të dërgojë forca shtesë për të luftuar xhihadistët, tha Ministria e Mbrojtjes së Rusisë.
Qeveria siriane mbështeti zbatimin e zonave të sigurta në vend dhe konfirmoi angazhimin e saj për të luftuar terrorizmin.
Nuk ka asnjë siguri mbi pajtueshmërinë e opozitës me iniciativën, pasi përfaqësuesit e militantëve dolën nga ceremonia e nënshkrimit në Astana, duke pretenduar se nuk do ta pranojnë Iranin si një shtet garantues.
Kombet e Bashkuara e kanë përshëndetur krijimin e zonave të sigurta, me Sekretarin e Përgjithshëm të OKB-së, Antonio Guterres që shpreson se kjo do të përmirësojë jetën e popullatës, dhe me të dërguarin Special të OKB-së për Sirinë, Staffan de Mistura që e ka përshëndetur iniciativën si një hap në drejtimin e duhur.
Presidenti i Rusisë, Vladimir Putin tha të mërkurën se nga një telefonatë me homologun e tij amerikan Donald Tramp, ai kuptoi se administrata amerikane e mbështet idenë e zonave të sigurta në Siri. Departamenti i Shtetit tha se i vlerëson “përpjekjet e Turqisë dhe Federatës Ruse për të ndjekur këtë marrëveshje”, dhe se e ka “inkurajuar opozitën siriane që të marrë pjesë aktive në diskutime”. Megjithatë, ai shprehu shqetësime lidhur me pjesëmarrjen e Iranit në këtë iniciativë. / © Gazeta Impakt
