Është rritur në 40 numri i të vdekurve nga tërmeti 6.7 ballë i cili të enjten e kaluar goditi ishullin Hokaido në veri të Japonisë.
Sipas agjencisë së lajmeve Kyodo, së fundmi me gjetjen e trupit të pajetë të një mashkulli 77 vjeçar në qytetin Atsuma, numri i personave që humbën jetën si pasojë e tërmetit është rritur në 40.
Përkundër njoftimeve se nga tërmeti ka njerëz të cilët llogariten si të zhdukur, qeveria lokale u ka dhënë fund punimeve për shpëtim. Ndërkaq rreth 2.700 persona kanë mbetur në strehimore.
Si pasojë e rrëshqitjeve të tokës një numër i madh i shtëpive janë shkatërruar.
Më tej thuhet se 8.000 shtëpi në ishullin Hokaido ende nuk mund të furnizohen me energji elektrike.
Kryeministri i Japonisë, Shinzo Abe vizitoi Sapporon, qytetin më të madh të ishullit ku ndodhi tërmeti, ku inspektoi punimet lidhur me fatkeqësinë.
Tërmeti 6.7 ballë paralizoi jetën në ishullin Hokaido.
Burimi: AA
