Bota

Katari ftohet në samitin e shteteve të Gjirit

DOHA (AA) – Emiri i Katarit, Sheikh Tamim bin Hamad Al Thani, ka pranuar të enjten një ftesë të dërguar nga homologu i tij nga Kuvajti, Sheikh Sabah al-Ahmad Jaber al-Sabah, ku ftohet të marrë pjesë në takimin e Këshillit të Bashkëpunimit të Gjirit (GCC), i cili do të mbahet javën e ardhshme në Kuwait City.

Ftesa për samitin i cili do të mbahet në datat 5 dhe 6 dhjetor, është dorëzuar përmes ambasadorit të Kuvajtit në Katar, Mohamed al-Ajami.

Ndryshe, në gjashtë muajt e fundit Kuvajti është duke luajtur një rol ndërmjetës në mosmarrëveshjen mes Katarit dhe bllokut të katër shteteve arabe, të cilin e kryeson Arabia Saudite.

Kriza në rajonin e Gjirit filloi më 5 qershor, kur Arabia Saudite, Emiratet e Bashkuara Arabe, Bahreini dhe Egjipti ndërprenë të gjitha marrëdhëniet diplomatike me Katarin, duke e akuzuar atë për “mbështetje të grupeve terroriste”.

Teksa Doha zyrtare i ka mohuar të gjitha akuzat, katër shtetet i kanë parashtruar Katarit një listë me 13 kërkesa, për të cilën Katari ka theksuar se nuk do të pranojë asnjë kërkesë që është në kundërshtim me të drejtën ndërkombëtare.