Ministri i Jashtëm grek, Nikos Kotzias dhe familja e tij janë kërcënuar me vdekje, teksa kanë marrë një letër anonime, ku shkruhej: ‘Kemi tre plumba për ju’.
Ka qenë Ministri i Mbrojtjes së Qytetarëve, Nikos Toskas, i cili e zbuloi këtë fakt, teksa foli në ANT1. Të paktën kështu raportojnë mediat greke, të cilat shkruajnë se Toskas denoncoi letrën dhe kërcënimin me vdekje ndaj Kotzias, duke e bërë publik.
Sipas tij, letra ishte anonime dhe në të ishte një mesazh i qartë. “Ne kemi tre plumba për ju”, – shkruhej në letrën dërguar Kotzias.
Ndërkaq, letra tashmë i është dorëzuar autoriteteve dhe kanë nisur hetimet, për të zbuluar se kush është shkruesi dhe dërguesi.
Ministri për Mbrojtjen e Qytetarëve e përshkroi letrën si ‘të papranueshme’ dhe i bëri thirrje pjesës tjetër të forcave politike të dënojnë veprime të tilla, siç tha ai, ‘është në interes kombëtar të ketë një klimë më të mirë’.