Zbardhen detaje tronditëse nga plagosja e ndodhur mëngjesin e sotëm në Malësi të Madhe.
Sipas të dhënave më të fundit, autori i plagosjes është Vasel Vuçinaj, i cili rezulton të jetë kreu i Partisë Socialiste i njësisë administrative Kelmend.
Mësohet se 49-vjeçari ka qëlluar me armë zjarri në drejtim të fqinjit e për pasojë ka plagosur në shpatull 51-vjeçarin Mark Zef CEKAJ në fshatin Vukël, Kelmend, Malesi e Madhe.
NJOFTIMI I POLICISE:
Plagos me armë zjarri për motive të dobëta një shtetas, arrestohet në kohë rekord nga Policia
Sekuestrohet arma e zjarrit automatik , me të cilën dyshohet se është kryer plagosja
Me datë 25.02.2018 , në orët e para të mëngjesit, është marrë njoftim te Salla Operative se në fshatin Vukël, Malësi e Madhe, ka të shtëna me armë zjarri.
Menjëherë në vendngjarje kanë mbërritur forcat policore të Sektorit Kundër Krimeve të Rënda , forcat policore të Komisariatit të Policisë Malësi e Madhe si dhe një grup i FNSh Shkodër për zbardhjen e plotë të ngjarjes si dhe kapjen e autorëve.
Nga hetimet paraprake ka rezultuar se si pasojë e një konflikti për motive të dobëta, shtetasi Vasel Vuçinaj ka qëlluar me armë zjarri automatik në drejtim të banesës së shtetasit M.Ç, 51 vjeç, banues në Vukël, i cili ka mbetur i plagosur në shpatull dhe ndodhet në spital , paraprakisht jashtë rreziku për jetën.
Pas një pune të mirëorganizuar të forcave policore të ndodhura në vendngjarje, u bë i mundur lokalizimi dhe kapja në kohë rekord e autorit të dyshuar të kësaj ngjarje së bashku me armën e krimit, konkretisht:
– Vasel Vuçinaj, 49 vjec, banues në fshatin Vukël, Malësi e Madhe
Në cilësinë e proves materiale u sekuestrua arma e zjarrit automatik si dhe në vendngjarje nga kqyrja u sekuestruan 12 gëzhoja.
Po vijojnë veprimet hetimore për dokumentimin e plotë të ngjarjes.
