jykata e Krimeve të Rënda ka vendosur sot në mënyrë të befasishme masën e sigurisë “arrest shtëpie” për ish-ministrin e Brendshëm Saimir Tahiri.
Në shtëpinë e tij kanë shkuar një grup prokurorësh dhe oficerësh të policisë gjyqësore të cilët i kanë komunikuar masën e sigurisë.
Ndryshimi i masës ndaj Tahirit vjen menjëherë një ditë pasi Komisioni Qendror i Zgjedhjeve vulosi dorëzimin e mandatit të deputetit nga Tahiri për t’ia kaluar atë Spartak Brahos.
Lapsi.al mësoi se Prokuroria e Krimeve të Rënda kërkoi masën “burg pa afat” për Tahirin, por Gjykata e Krimeve të Rënda e la në “arrest shtëpie”.
Tashmë Tahirit do t’i bllokohet sërish pasaporta. Atij nuk i lejohet më të largohet nga banesa, nuk i lejohet të kontaktojë njerëz të tjerë përveç familjarëve të tij dhe avokatëve.
Njoftimi i prokurorisë
Gjykata vendosi caktimin e masës së sigurimit personal “Arrest në shtëpi”, ndaj shtetasit nën hetim Saimir Bashkim Tahiri, i datëlindjes 30.10.1979, si person i dyshuar për kryerje të veprave penale “Trafikimi i narkotikëve”, në bashkëpunim, në formën e grupit të strukturuar kriminal, e parashikuar në nenet 283/a dhe 333/a, në lidhje me nenin 28 të Kodit Penal dhe, “Korrupsioni pasiv i funksionarëve të lartë shtetërorë ose i të zgjedhurve vendorë”, e parashikuar në nenin 260 të Kodit Penal. Urdhërohet shtetasi nën hetim Saimir Bashkim Tahiri të mos largohet nga banesa e tij, ndodhur në Tiranë, Rruga “Kodra e Diellit”, Pallati Nr.3.
