Presidenti Ilir Meta në një mesazh mëngjesin e kësaj të diele, thotë se ndëshkimi i merituar i puçistëve do të mbrojë popullin tonë nga instalimi i një regjimi tiranik një partiak dhe kleptokratik.
Teksa bën thirrje për pjesëmarrjen në marshimin e nesërm për mbrojtjen e Kushtetutës, Meta përkujton thirrjen e Arben Imamit si drejtues kryesor i Lëvizjes Studentore në përballjen finale me kupolën e diktaturës.
Postimi i plotë i Metës:
Kurrë nuk e mendoja se pas 30 viteve do të vinte kjo ditë, që të ftoja më ✌mars të gjithë qytetarët e Shqipërisë, për të mbrojtur fitoren më të madhe të popullit tonë, pluralizmin politik, lirinë dhe demokracinë.
Vetëm paprekshmëria e Kushtetutës dhe ndëshkimi i merituar i puçistëve që e kanë dhunuar atë, do ta mbrojë popullin tonë nga instalimi i një regjimi tiranik njëpartiak dhe kleptokratik.
Po ndaj me ju disa emocione të miat kur një nga ish-drejtuesit kryesor të Lëvizjes Studentore, Arben Imami më thërriste mua dhe disa studentë të rinj për të shkuar në përballjen finale me kupolën e diktaturës, që u detyrua të pranonte kapitullimin e regjimit më të pashembullt shtypës dhe izolues në kontinent.
Le ta dëgjojë nesër e gjithë bota demokratike thirrjen e popullit shqiptar: E DUAM SHQIPËRINË SI GJITHË EUROPA!
#PërKushtetutën #PërRepublikën #PërShqipërinë #PërKombin #BashkohuEdheTi