Mijëra myslimanë në Maqedoni, Shqipëri dhe Kosovë kanë falur sot namazin e Fitër Bajramit. Ata janë mbledhur së bashku në xhamitë në Shkup, Tiranë dhe Prishtinë, por edhe në qytete tjera të këtyre vendeve për të falur namazin e Fitër e Bajramit.
Nën përkujdesjen e Bashkësisë Fetare Islame (BFI) të Maqedonisë, manifestimi qendror i faljes së namazit të Fitër Bajramit në këtë vend u mbajt në xhaminë Mustafa Pasha në Shkup. Gjatë ceremonisë u këndua Kuran dhe ilahije para besimtarëve të shumtë të cilët mbushën edhe oborrin e xhamisë.
Namazi u drejtua nga kryetari i BFI-së, Sulejman Rexhepi, ndërsa Hytben e Bajramit, në emër të kreut të BFI-së, në gjuhën shqipe, maqedonase dhe turke e lexoi Adnan Jahja, nxënës i Medresesë “Isa Beu” në Shkup, i cili iu referua rëndësisë së muajit të Ramazanit.
“Në këtë muaj arriti mirësia e njerëzimit dhe drita, mbizotëroi mëshira dhe humaniteti, u krijua dashura dhe respekti, prandaj ky muaj gjithmonë duhet të festohet dhe të përjetohet me gjithë qenien tonë”, u theksua në mesazh.
Lutje lexoi edhe atasheu për çështje fetare në Ambasadën turke në Shkup, Murat Alkan.
Edhe në xhamitë tjera të Maqedonisë në prani të madhe të besimtarëve mysliman u fal namazi i Fitër Bajramit.
Besimtarët myslimanë në të gjithë Shqipërinë po ashtu kanë falur namazin e Fitër Bajramit.
Mijëra besimtarë janë mbledhur në manifestimin qendror në Bulevardin “Dëshmorët e Kombit” në Tiranë, për të falur namazin e Bajramit, në përfundim të muajit të Ramazanit.
Namazi i Fitër Bajramit është falur edhe në xhamitë e tjera të vendit.
Me rastin e festës së Fitër Bajramit mesazhe urimi kanë ardhur nga politikanë dhe zyrtarë të lartë të vendit, të cilët kanë uruar besimtarët muslimanë
Nën organizimin e Bashkësisë Islame të Kosovës, është mbajtur manifestimi qendror për faljen e namazit të Fitër Bajramit në xhaminë e Madhe – Sulltan Mehmet Fatih në Prishtinë, drejtuar nga sekretari i përgjithshëm i Bashkësisë Islame të Kosovës, Resul Rexhepi.
Hytben e Fitër Bajramit në xhaminë̈ e Madhe në Prishtinë e ka mbajtur Myftiu i Kosovës,
“Ju thërras të gjithëve popull dhe institucione që të marrim shkas festat tona fetare dhe kombëtare për t’u angazhuar për interesin shoqëror të vendit, për të mirën e përbashkët duke shfrytëzuar momentet sikur këto bashkimi rreth qëllimeve fisnike të bëhet më i lehtë dhe më i fortë. Kështu mund të marshojmë bashkë drejtë qëllimeve tona shoqërore e shtetërore”, tha Tërnava.
Sot besimtarë myslimanë kremtojnë Fitër Bajramin. Siç edhe është traditë, pas faljes së namazit besimtarët mylsimanë vazhdojnë festimet në shtëpitë e tyre, duke shkëmbyer vizita mes të afërmeve, etj. (AA)