Nëse je musliman, mos i bëjë këto në aeroplan

E përditshmja The Independent ka ironizuar me disa prej rasteve të evidentuara të keqtrajtimit të pasagjerëve mysliman nga stafi i ekuipazhit të disa prej kompanive ajrore më prestigjioze kryesisht amerikane, me arsyetime të cilat janë sa qesharake aq edhe absurde, por që në sfond të gjitha kanë një motiv të përbashkët – islamofobinë.

Gazeta britanike duke marrë shkas nga këto incidente të cilat u kanë ndodhur brenda më pak se një viti disa prej pasagjerëve mysliman, ka përgatitur një listë prej 9 pikave të cilave duhet t’u përmbahet secili mysliman, i cili planifikon të udhëtojë me aeroplan, në mënyrë që të mos përjashtohet nga fluturimi.

Pra, si mysliman, momentin që merr një fluturim, nuk lejohet të:

Të kërkosh ujë
Disa ditë më parë, dy femra myslimane kanë humbur fluturimin e tyre, për shkak se janë detyruar të shoqërohen jashtë nga policë të armatosur, për arsyen e vetme se stjuardi e kishte ndier veten “jo të sigurt” në prezencën e tyre.

Njëra prej këtyre grave, Niala Mohammad, ka thënë se aeroplani i tyre ka qëndruar i ulur për toke për pesë orë në Miami dhe gjatë gjithë kësaj kohe nuk janë lejuar të shërbehen me ujë as me ushqim. Momentin që janë ankuar, janë detyruar të lëshojnë aeroplanin.

Të kërkosh ndërrimin e ulëses me ndonjë pasagjer tjetër
Një grua myslimane është detyruar të zbresë nga aeroplani, në një aeroport në Chicago, pa asnjë arsyetim, vetëm për shkak se kishte kërkuar nga personi në ulësen fqinje që t’i ndërrojnë vendet.

Organizata myslimane amerikane CAIR ka bërë thirrje për një hetim të menjëhershëm, me pretekst se ky veprim është motivuar nga një paragjykim i pastër, për shkak kjo grua ishte me prejardhje somaleze dhe ishte me shami.

Në momentin kur policia ka pyetur stjuardesën te dera, nëse ka ndonjë arsye përse gruaja myslimane është nxjerrë jashtë aeroplanit, stjuardesa është përgjigjur me një “jo”, duke shtuar se ajo “nuk është ndier komod” me prezencën e pasagjeres.

Të kesh emër të ngjashëm me dikë tjetër
Syed Adam Ahmed, një djalë 6 vjeçar nga Kanada, i është ndaluar në mënyrë të vazhdueshme hyrja në aeroplan, për shkakun se gjendet në listën e “pasagjerëve me rrezik të lartë”.

Pavarësisht se autoritetet kishin premtuar se do ta heqin emrin e tij nga lista muaj më parë, Syed është ndaluar të fluturojë me Air Canada deri në muajin mars.

Edhe pse nuk kanë ndonjë sqarim pse djali i tyre ndodhet në listë, prindërit besojnë se arsyeja e vetme që u bie ndërmend është fakti se emri i birit të tyre mund të jetë i ngjashëm me të ndonjë terroristi të dyshimtë.

Mos fol arabisht
Një njeri i cili ka ardhur në SHBA si refugjat irakian, u nxor jashtë nga një fluturim i Southwest Airlines, në muajin prill pas një telefonate që ai pati me familjarë të tij në Baghdad.

Pasi kishte njoftuar xhaxhanë e tij përmes telefonit për një drekë që kishte pasur me Sekretarin Gjeneral të Kombeve të Bashkuara Ban Ki-moon, Khairuldeen Makhzoomi zbarkoi nga aeroplani vetëm për shkak se biseda e tij kishte “alarmuar” një pasagjer tjetër, duke u akuzuar nga ai për “komente potencialisht kërcënuese”.

Dukja myslimane
Një familje pesë anëtarëshe është nxjerrë nga një aeroplan i kompanisë United Airlines në aeroportin në Chicago, disa momente para ngritjes në ajër, për atë që stafi e ka quajtur “shkaqe sigurie”, por pa dhënë ndonjë arsyetim të plotë.

Eaman-Amy Saad Shebley, e cila ishte me bashkëshortin e saj dhe tre fëmijë, kishte pyetur pilotin nëse ky ishte një vendim diskriminues. Piloti është përgjigjur se ishte “çështje e sigurisë”, pa u dhënë në detaje.

Të kesh emër mysliman
Një burrë mysliman u hoq nga një fluturim të American Airlines muajin e kaluar, pasi stjuardesa në mënyrë publike lexoi emrin e tij, numrin e ulëses dhe tha se ai do të jetë “nën vëzhgim”.

Mohamed Ahmed Radwan ka hipur në aeroplan në Charlotte, North Carolina duke vazhduar: “Mohamed Ahmed, Ulësja 25-A: Do të jesh nën vëzhgim gjatë gjithë kohës”.Ai nuk bëri asnjë lajmërim tjetër, për asnjë pasagjer tjetër.

Të djersiturit
Një çift bashkëshortor ka akuzuar Delta AirLines për islamofobi, për shkak të përjashtimit nga fluturimi Paris-Cincinnati. Faisal dhe Nazia Ali shpjeguan se ishin veçuar nga pasagjerët tjerë, vetëm për shkak se ishin djersitur dhe kishin përdorur fjalën ‘Allah’, të cilën ata e mohuan.

Leximi i librit
Një punëtore shëndetësore myslimane është ndaluar në aeroportin e Britanisë së Madhe vetëm për shkak se një pjesëtar i ekuipazhit e kishte vërejtur atë duke lexuar një libër për kulturën siriane, pas kthimit nga muaji i mjaltit.

Faizah Shaheen, e cila ndihmon pacientët adoleshent me probleme mentale nga radikalizimi, ishte duke u kthyer nga muaji i mjaltit në Marmaris të Turqisë, kur është ndaluar nga policia Yorkshire South në Aeroportin Doncaster Airport me 25 korrik.

Ajo është marrë në pyetje nga zyrtarë policor për 15 minuta, në lidhje me librin të cilin kishte me vete, të titulluar “Siria flet: Arti dhe Kultura nga vija e parë e frontit”.

Detyrat e matematikës
Një ekonomist mysliman është larguar nga një fluturim i American Airlines pasi një pasagjer ulur pranë tij, i kishte përzier ekuacionet matematikore me alfabetin arab, për çka edhe është dyshuar për terrorizëm./TSH

NDANI KËTË POSTIM

Mund tju interesojne