Së paku 15 persona kanë humbur jetën që kur shpërthyen protestat këtë muaj në Nigeri kundër brutalitetit të policisë, tha të hënën Amnesty International (AI).
Organizata për të drejtat e njeriut tha se dy policë ishin në mesin e viktimave ndërsa qindra njerëz janë plagosur.
Protestat mbarëkombëtare kanë vazhduar që nga 7 tetori pavarësisht nga shpërbërja e njësisë policore të Skuadrës Speciale Kundër Grabitjes (SARS).
Protestat kundër SARS vazhduan për disa ditë dhe demonstruesit rrethuan selinë e saj.
Ata brohorisnin “Fundi i SARS” dhe derdhën bojë të kuqe në rrugën përpara ndërtesës, referencë simbolike për vrasjet e pretenduara nga oficerët e SARS.
Pavarësisht shpërbërjes së SARS, protestuesit vazhduan demonstratat e tyre duke kërkuar reforma gjithëpërfshirëse të policisë, përfshirë dënime për oficerët që kanë gabuar, lirimin e pakushtëzuar të të gjithë protestuesve të ndaluar dhe kompensimin për familjet e viktimave të brutalitetit policor.
“Shpërbërja e SARS është vetëm hapi i parë në angazhimin tonë për reforma të gjera policore në mënyrë që të sigurojmë që detyra kryesore e policisë dhe agjencive tjera të zbatimit të ligjit mbetet mbrojtja e jetës së njerëzve tanë”, tha presidenti i Nigerisë, Muhammadu Buhari, javën e kaluar në Twitter./AA
