Mamdani “nën zjarr”, myslimani që tronditi New York-un dhe sfidon elitën amerikane. Sot ka nisur votimi me prezencë fizike në New York për zgjedhjet që konsiderohen si më të ndjekurat e këtij viti në SHBA, garën për kryetar bashkie të qytetit më të madh amerikan.
Qytetarët po votojnë mes tre kandidatëve kryesorë: demokrati progresist Zohran Mamdani, i cili prin në të gjitha sondazhet; ish-guvernatori Andrew Cuomo, që garon si i pavarur pas humbjes në primaret e qershorit; dhe republikani Curtis Sliwa, që mban një bazë të vogël konservatore në qytet.
Mamdani, me origjinë nga Uganda dhe prejardhje indiane, pritet të bëhet kryetari i parë mysliman në historinë e New York-ut nëse fiton. Ai ka frymëzuar elektoratin e majtë me një platformë që përfshin kujdes universal për fëmijët, transport publik falas dhe ngrirje të qirave për më shumë se 1 milion apartamente me qira të rregulluar. Por në të njëjtën kohë, është përballur me një valë të ashpër sulmesh personale, racore dhe islamofobike nga rivalët e tij politikë dhe figura të pasura të establishmentit.
Ish-guvernatori Cuomo ka intensifikuar sulmet në ditët e fundit, duke përdorur gjuhë të ngarkuar me tone racore dhe nëntekste që lidhen me 11 Shtatorin. Në një emision radiofonik ai aludoi se Mamdani nuk do të ishte i besueshëm në rast të një sulmi terrorist, deklaratë që shkaktoi zemërim të gjerë. Pak orë më pas, ekipi i tij publikoi një video raciste të gjeneruar nga inteligjenca artificiale ku Mamdani paraqitej në mënyrë nënçmuese, gjë që u dënua publikisht nga shumë figura politike amerikane.
Edhe kryebashkiaku aktual Eric Adams, pasi u tërhoq nga gara, ka sulmuar Mamdanin duke e quajtur “komunist”, ndërsa figura republikane si Donald Trump dhe kongresmenia Elise Stefanik e kanë cilësuar kandidatin demokrat si “rrezik për qytetin”. Në një tjetër front, një grup rabinësh publikuan një letër të hapur kundër tij për qëndrimet kritike ndaj Izraelit dhe mbështetjen për pavarësinë palestineze.
Megjithatë, Mamdani ka ruajtur një ton të qetë dhe të vendosur, duke e cilësuar fushatën kundër tij si “raciste dhe të dëshpëruar”. Ai ka theksuar se qëllimi i kundërshtarëve është të trembin votuesit dhe të shmangin debatet për çështjet reale të qytetit, si kriza e strehimit dhe rritja e kostos së jetesës.
Në anën tjetër, fushata e Cuomo-s po financohet nga disa prej miliarderëve më të njohur në New York, përfshirë Bill Ackman, Michael Bloomberg dhe Ronald Lauder, të cilët kanë derdhur miliona dollarë në super-PAC-e që synojnë ta ndalin Mamdanin. Por këto ndërhyrje duket se vetëm kanë forcuar narrativën e kandidatit të majtë si përfaqësues i klasës punëtore kundër elitave financiare.
Sondazhet e fundit tregojnë se Mamdani ruan një epërsi të qartë: rreth 43 deri në 45 për qind e votuesve deklarojnë mbështetje për të, ndërsa Cuomo ndodhet në intervalin 28–30 për qind dhe Sliwa rreth 19 për qind. Pothuaj 10 për qind e zgjedhësve mbeten ende të pavendosur. Në një përballje të drejtpërdrejtë mes Mamdanit dhe Cuomo-s, diferenca ngushtohet në rreth 4 pikë, por favorizon ende kandidatin progresist.
Ndërkohë, një sondazh i veçantë ka treguar se më shumë se një e katërta e banorëve të qytetit do të mendonin të largoheshin nga New York-u nëse Mamdani zgjidhet kryetar bashkie, shenjë e polarizimit të thellë që ka krijuar kjo garë.
Megjithatë, analistët e vlerësojnë Mamdanin si kandidatin më të favorshëm për fitore. Ai gëzon mbështetje të gjerë në lagjet e punëtorëve dhe të komuniteteve emigrante, ndërsa retorika përfshirëse dhe energjia e fushatës së tij kanë sjellë në votime shumë të rinj që tradicionalisht nuk marrin pjesë. Votimi i hershëm, që përbën mbi 30 për qind të pjesëmarrjes totale, mund të jetë faktori përcaktues që të vulosë fitoren e tij.
Në thelb, gara e New York-ut është shndërruar në simbol të përplasjes mes brezave të rinj të demokratëve progresistë dhe strukturës së vjetër të partisë. Çfarëdo që të ndodhë në ditët në vijim, kjo betejë pritet të ketë jehonë kombëtare dhe të përcaktojë drejtimin politik të qytetit më të rëndësishëm në SHBA për vitet që vijnë. /Pamfleti
