Një aeroplan udhëtarësh i prodhuar nga Kina bëri dje fluturimin e vet të parë. “C919” vlerësohet si një gur themeltar në industrinë e aviacionit civil të Kinës.
Megjithatë, ky nuk është aeroplani i parë i prodhuar në mënyrë të pavarur nga Kina.
Prodhimi i një aeroplani udhëtarësh në Kinë u propozua për herë të parë në vitin 1970.
87-vjeçari Cheng Bushi ishte zv.kryeinxhinier i avionit:
“Fluturimi provë shkoi shumë mirë, pastaj aeroplani fluturoi në të gjithë Kinën: Harbin, Tibet, Urumqi dhe Kunming.”
Më vonë, në vitin 1985, Korporata Industriale e Aviacionit e Shangait bashkëpunoi me firmën amerikane “McDonnell Douglas” për të prodhuar MD82, një aeroplan i vogël udhëtarësh. Ky aeroplan e bëri fluturimin e vet të parë në Kinë në korrik të vitit 1987.
Meng Jianxin, një inxhinier me 38 vjet përvojë, mori pjesë në prodhimin e Y-10 dhe MD-82:
“Kina e ka pasur gjithmonë ëndrrën për të ndërtuar një aeroplan të madh. Kur i shihnim të gjithë ata aeroplanë të prodhuar nga vende të tjera, natyrisht që dëshironim që të kishim avionin tonë”.
Megjithatë, bashkimi i mëvonshëm i firmës amerikane me “Boeing”-un e çoi drejt fundit projektin.
C919 është prodhuar nga Korporata e Aviacionit Komercial e Kinës. Nëse moti do të jetë i përshtatshëm, C919 do të niset nga Aeroporti Ndërkombëtar “Pudong” i Shangait të premten për fluturimin e parë.
Analistët e industrisë thonë se C919 është përgjigjja kineze ndaj “Boeing 737” dhe “Airbus 320”, duke sinjalizuar hyrjen e Kinës në tregun global të aviacionit si një lojtar i rëndësishëm.
Korporata e Aviacionit Komercial e Kinës thotë se aeroplani ka kaluar thuajse 120 teste të standardeve ndërkombëtare dhe ka siguruar tashmë 570 porosi nga 23 kompani ajrore kineze dhe të huaja.
