Pjesëmarrja në zgjedhjet e 25 qershorit raportohet ndjeshëm më e ulët se sa në vitin 2013, bën të ditur Komisioni Qendror i Zgjedhjeve përmes shërbimit të vet për raportimin në kohë reale mbi votimin dhe rezultatin.
KQZ raporton se deri në orën 10 të mëngjesit 13,29 për qind e shqiptarëve shprehën vullnetin e tyre. Pjesëmarrja më e ulët raportohet në Qarkun Korçë me 9.8 për qind ndërsa më e larta raportohet në Lezhë me 16.35 për qind. Në vitin 2013 në Korçë deri në orën 10 pjesëmarrja qe 37.1 për qind, ndërsa në Lezhë qe 21.5 për qind.
Në Tiranë, pjesëmarrja deri në orën 10 sot qe 15 për qind ndërkohë që në vitin 2013 pati qenë 25 për qind.
Në zgjedhjet e vitit 2013, pjesëmarrja qe veçanërisht e lartë. Në fund të ditës patën votuar 53 për qind të të gjithë votuesve. Ndonëse në listat e zgjedhësve në Shqipëri gjenden aktualisht rreth 3.45 milionë votues, një pjesë e madhe e popullsisë gjendet aktualisht në emigrim dhe për rrjedhojë nuk merr pjesë në zgjedhje.
Të dhënat për pjesëmarrjen raportohen nga KQZ në bazë të të dhënave të pjesshme të siguruara nga qendrat e votimit në të gjithë vendin. Për këtë shkak, këto të dhëna duhet të merren me rezerva pasi mund të jenë të ndryshme nga realiteti në varësi të pjesëmarrjes në qendrat e votimit që kanë raportuar.
