Bota

Plane për zëvendësimin e sekretarit Tillerson me shefin e CIA-s, Pompeo

Secretary of State Rex Tillerson delivers an address on “The U.S. and Europe: Strengthening Western Alliances” at Wilson Center in Washington, Tuesday, Nov. 28, 2017. (AP Photo/Sait Serkan Gurbuz)

Shtëpia e Bardhë ka plane për të zëvendësuar sekretarin e Shtetit Rex Tillerson me zotin Mike Pompeo, Drejtor i CIA-s, brenda disa javësh, sipas një zyrtari të lartë të administratës.

Në bazë të planit, senatori republikan Tom Cotton do të zëvendësojë zotin Pompeo në krye të CIA-s, njofton gazeta New York Times, duke iu referuar zyrtarëve të lartë të administratës.

Gazeta, e para që njoftoi rreth këtij plani, thotë se ende nuk është plotësisht e qartë nëse Presidenti Trump ka dhënë miratimin përfundimtar për këto ndryshime.

Largimi i zotit Tillerson do t’i jepte fund karrierës së tij në administratë gjatë së cilës ai ka patur shpesh herë mosmarrëveshje me Presidentin Trump rreth çështjesve si ajo e Koresë së Veriut dhe po ashtu ishte vënë nën kritika rreth planeve të tij për të bërë shkurtime në Departamentin e Shtetit.

John Kelly, shefi i stafit të Shtëpisë së Bardhë, është hartuesi i këtij plani dhe e ka diskutuar atë me zyrtarë të tjerë të lartë, sipas gazetës.

Ndryshimet pritet të ndodhin para fundit të vitit ose në fillim të janarit.

Për largimin e zotit Tillerson flitej prej muajsh dhe ambasadorja në OKB, Nikki Haley ishte përmendur si zëvendësuesja e tij e mundshme. Por zoti Pompeo duket se ka dalë në krye të kandidatëve për postin, duke fituar besimin e Presidentit Trump për çështjet e sigurisë kombëtare.