Polumbarët nxjerrin trupin e peshkatarit në Pogradec

Nxirret pas orësh të tëra kërkimi trupi i pajetë i peshkatarit në Pogradec. Kërkimet rinisën mëngjesin e sotëm kur dy polumbarë u zhytën në ujërat e rezervuarit por për shkak të temperaturave tepër të ulëta nuk mundën ta nxirrnin trupin e 56-vjeçarit Ramazan Kojtari nga uji. Më pas trupi u nxor me anë të rrjetave.

Trupi i viktimës ishte në thellësi të rezervuarit, në një distancë rreth 50 m nga bregu, në vendin ku u gjet varka dhe trupi i peshkatarit tjetër. Kojtari, 56 vjeç u mbyt bashkë me shokun e tij Arben Pupa pasditen e djeshme.

Si Kojtari dhe Pupa ishin banorë të zonës dhe administronin këtë rezervuar. Sipas dëshmive ata herë pas here dilnin për peshkim pasi hidhnin rasatin e peshkut për shumim.

Dyshohet se pikërisht mbingarkesa në varkë mund të ketë çuar në përmbytjen e saj pasi kishin zënë një sasi të madhe peshku. Gjithsesi këto janë vetëm dyshime, pasi askush nuk e ka parë ngjarjen.

Trupi i 50-vjeçarit Pupa u nxor dje nga uji prej banorëve të fshatit dhe shërbimeve të Policisë në vendngjarje.

NDANI KËTË POSTIM

Mund tju interesojne