Qeveria bullgare e Boyko Borissov vlerëson se presidenca e BE-së e drejtuar prej saj, ka sjellë arritje thelbësore për Ballkanin Perëndimor. Në një raportim para Parlamentit, Borissov dhe ministrat e tij, deklaruan se është meritë edhe e presidencës bullgare që rajoni përfitoi një përfshirje të qartë dhe riafirmim të perspektivës europiane.
Ne kemi qenë të aftë ta nxjerrim këtë çështje jashtë kontekstit të vet delikat, tha Borissov.
Sipas tij Traktati i Miqësisë mes Bullgarisë dhe Maqedonisë është modeli I përshtatshëm për t’u ndjekur në Ballkan edhe nga vendet e tjera, në mënyrë që problemet e bartura të kapërcehen me dialog. Po kështu Borissov ka cilësuar se është pasojë e politikës së presidencës bullgare edhe propozimi i Këshillit të Europës që vendosi afate të afërta dhe konkrete për hapjen e negociatave me Maqedoninë dhe Shqipërinë.
Me tone pozitive ka folur edhe ministrja e Jashtme Ekaterina Zaharieva që tha para deputetëve se Bullgaria ishte e aftë zhbllokonte perspektivën europiane të Ballkanit Perëndimor.
Sipas saj, të gjithë liderët e rajonit dhe drejtues të BE-së bien dakord me këtë konkluzion që është kundërshtuar në përgjithësi nga socialistët bullgarë që janë në opozitë. Disa fjalë i ka thënë edhe ministri i Mbrojtjes Krassimir Karakachanov, që shpalli se ambicia më e madhe e Bullgarisë është të shohë progresin në Ballkanin Perëndimor dhe afrimin e rajonit me BE-në dhe NATO-n.
