Në mbledhjen e fundit të Konferencës së Kryetarëve, deputetët e rinj të PS-së, nëpërmjet zërit të Myslym Murrizit janë vetëshpallur të pastrehë dhe i kanë kërkuar kryetarit të vërë dorën në zemër e t’u japë një kredi të butë për të blerë shtëpi. Kërkesa e tyre është mbështetur në precedentët e mëpërashëm, tek ligji që deri në vitin 2009 zbatohej për çdo deputet, tek ato vendimet që deputetët kishin makinë, shtëpi, celular, shërbime ekstra etj., etj. Si të tjerët, edhe ata duan të kenë privilegjet e të qenit ligjvënës. Dhe këtu rroga nuk quhet fare.
Thënë ndryshe rioshët e Kuvendit e duan nga një shtëpi në Tiranë. Me gjithë atë kontribut që japin e mëritojnë apo jo?! Ose më mirë të themi me gjithë ato para që ju kalojnë nën hundë, me gjithë ato miliona që Rama iu jep oligarkëve të vet, tenderat e pafundmë që e kanë futur Shqipërinë në borxhe deri në brezin e shtatë, iu jep të drejtë edhe atyre të hapin gojën. Sidomos pasi shohin ca kapadainj që krekosen në sallë e ca të tjerë që hanë në kurriz të shqiptarëve.
Fundja, Rama ia ligjëroi shërbimin “rivalit” politik, Astrit Patozi, duke i dhënë zyra në përdorim pa asnjë qindarkë në këmbim. Me këtë rast edhe deputetët shpresojnë të kapin një kockë.
A do ua plotësojë dëshirën Rama? Të shohim. Me kaq shumë dhimbje koke sa ka në këto momente, duket se Kryeministri nuk ka pasur kohë as t’u sulet të vetëve. Siç bën zakonisht…/Pamfleti/
