Ministri i Jashtëm rus, Sergey Llavrov, akuzoi SHBA-në sot, se po planifikon ndarjen e Sirisë.
“Planet për ndarjen de fakto të Sirisë, tashmë ekzistojnë. Jemi në dijeni për këtë, prandaj do ti pyesim kolegët tanë amerikanë se si e kanë paramenduar një gjë të tillë”, tha Llavrov gjatë një fjalimi të mbajtur në garën “Liderët e Rusisë”.
Ai shtoi më tej se amerikanët kanë ndryshuar deklaratat për arsyet e qëndrimit të tyre në Siri, duke lënë anash garancitë e dhëna, se prania e tyre në Siri ka vetëm një qëllim, mposhtjen e terroristëve.
“Tashmë ata thonë se prania e tyre do të jetë deri atëherë kur do të binden se Siria ka filluar një proces të qëndrueshëm të stabilitetit politik, që nënkupton ndryshimin e regjimit”, tha Llavrov.
Siria sapo ka filluar të dalë nga një luftë shkatërruese qytetare që filloi në fillim të vitit 2011, kur regjimi i Asadit u përplas me protestat pro-demokratike me një trazirë të papritur.