Ministria e Punëve të Jashtme të Kosovës shpreh keqardhje dhe indinjatë për vendimin e autoriteteve të Beogradit për të mos lejuar vizitën e zëvendëskryeministrit dhe ministrit të Punëve të Jashtme të Republikës së Kosovës, Behgjet Pacolli, në Novi Pazar.
Sipas një komunikate të MPJ, Republika e Kosovës ka vepruar gjithmonë në përputhje me marrëveshjen e Brukselit mbi vizitat e zyrtarëve të lartë dhe ka respektuar procedurat e kërkuara.
“Ky rast tregon përsëri se Beogradi nuk është i angazhuar të respektojë marrëveshjet e Brukselit dhe shkakton tensione të panevojshme për të parandaluar vizitat e zyrtarëve të lartë të Kosovës në territorin e Serbisë. Ne, sot jetojmë në shekullin, ku lëvizja e lirë e njerëzve është e drejtë themelore e njeriut dhe çdo shtet e qeveri duhet ta respektoj atë. Kosova ka respektuar këto të drejta me përkushtim të madh dhe do t’i respektojë gjithmonë derisa mos të abuzohet me to, si në shumë raste që ka ndodhur në të kaluarën me mysafirët nga shteti fqinj verior. Do të ishte e arsyeshme që Kosova të mbajë të drejtën për masa reciproke kundërdrejt autoriteteve të Beogradit, sipas marrëveshjes së Brukselit, por ne i dedikohemi të drejtave fundamentale për lëvizjen e lirë të njerëzve përderisa ato mos të jenë qëllimkeqe”, thuhet në komunikatë.
MPJ thotë se edhe vizitat e kosovarëve tek bashkëkombasit e tyre në Preshevë, Bujanoc dhe Medvegjë duhet të vihen në reciprocitet me vizitat e serbëve tek bashkëkombësit e tyre në Kosovë./ TRT
