ShBA-të kanë kërkuar një takim të hënën me dyer të mbyllura të Këshillit të Sigurimit të Kombeve të Bashkuara (OKB) për çështjen e Iranit.
Burime diplomatike theksuan se ShBA-të i dërguan Kuvajtit, i cili është kryesuesi i radhës i Këshillit të Sigurimit të OKB-së, një kërkesë zyrtare, ku Washingtoni do të paraqesë zhvillimet e reja për sulmet ndaj dy anijeve cisternë të naftës në Gjirin e Omanit për të cilat fajësohet Irani.
Javën e kaluar në Gjirin e Omanit ndodhën shpërthime në dy anije të mëdha cisternë të naftës, ku ekipet e kërkim-shpëtimit të Iranit shpëtuan 44 persona nga ekuipazhet e anijeve dhe të cilët u dërguan në portin detar Xhask të provincës Hurmuzgan.
Komanda Qendrore e Forcave të ShBA-së (CENTCOM) ka njoftuar se Irani pas shpërthimeve në anijet cisternë më 13 qershor ka shtënë ndaj dronit amerikan tip “MQ-9 Reaper” që ndodhej në Gjirin e Omanit, por nuk arriti ta qëllojë.
Tensionimi mes ShBA-së dhe Iranit u përshkallëzua edhe më shumë pas rrëzimit të Iranit të një droni amerikan tip “RQ-4 Global Hawk” me raketë tokë-ajër./trt